Nnaḍur (TIFRAY) – yeggur ad banen deg ussan i d-ittasen ca n idlisen d imaynuten deg yiger n tsekla Tamaziɣt di Arrif, ad ggen fus-nnsen di tgumi n Trifiyt.
Ammu, tura tamarit Tarifit, Btisam Xbiza, ca n tmezgunin i iḥenjiren imeẓẓyanen, tegga-asent: “Ad nirar amezgun: timezgunin tisegmanin”, s usekkil n Tfinaɣ ibedd xa-s wammas n trezzutin d tzrawin timaziɣin di Arrif.
X weɛrur n udlis tura Xbiza: “Iwriken n ku icten zi tmezgunin-a, reẓẓment i tazzanin tiwwura n welmad d uxarres, ttawsent-asen ḥuma ad xsen tutlayt-nnsen tamaziɣt”.
Zeg uɣezdis-nniḍen, yeggur ad d-issufeɣ uturjman Arifi Ḥmed Ɛewwed wungal n George Orwell umi yegga isem “Tazribt n imudar”, s usekkil n Tfinaɣ.
Mamek i d ɣa yessufeɣ, ula d umari Arifi Muḥemmed Buzeggu, ijjen wungal-nniḍen s Tmaziɣt umi yegga isem n “Xwa ssa a Lwiza” i d ɣa yeffɣen s usekkil Alatini.
(Tifruray di min d-ittasen)