Deg yij n tebrat sinyin-tt waṭṭas n ibuɣawen n Nnaḍur/ Lḥusima, d yinneḍni zeg imukan nniḍen zi Lmeɣrib, ssilyen-tt ɣer tmunt n ibuɣawen aɛraben, gerwen dag-s alaɣi-nsen i tmunt-a ḥuma ad tbeddel isem, ad tedwel qqaren-as “tamunt n ibuɣawen n tefriqt n nnej d ccerq n lwesṭ”.
Tabrat-a i dd-yusin di twala wiss tnayen n lbiru n lebda n tmunt n ibuɣawen aɛraben i tesnewju tyemmunt n ibuɣawen n Nnaḍur/ Lḥusima, ikellef ubuɣaw Xalid Umɛiz, d netta i tt-yessersen jer ifassen n lbiru n tmunt n ibuɣawen.
Tateswirt zi lḥiḍ n facebook n ubuɣaw Xalid Umɛiz
Zi min dd-yusin di tebrat-a: “wer iweḍḍer ula x yijjen belli igduden n Tefriqt n nnej iẓewran-nsen d imaziɣen (…) s uya, aqa umi tettwasemma tmunt-nneɣ s yisem n tmunt n ibuɣawen aɛraben, manaya d ij n tɛunsurit tban, tmeḥḥa tinettitin i yemsebḍan n ibuɣawen i yellan di tmunt, amen ɛawed manaya iɣeṭṭel zeg yegduden n imukan-a, zeg-sen agdud amaziɣ d wegdud akurdi, deg yij n wakud yettwassen s idusturen i dd-yerrin taynit i tnettit tamaziɣt.
Asurif-a, d ij n tfawt d tazeggʷaɣt sserɣen-tt ibuɣawen imaziɣen di Nnaḍur, ḥuma ad ssnen yinni imeḥḥan tinettitin s yisem n tuɛɛerba, aqa akud ibeddel, iwdan faqen, sinta-nni n umaḍal aɛrab qeḍwen-as ifilan, ccin-ten iɣerḍayen, wer teqqim txeddem ula tneffeɛ!