Yusi-d umsagar-a s adu uzwel : “Arrif.. Tilalt n tutlayt tayemmat di tugguzt n twengimt d usdus n tnettit”.
Amelqi-a yusi-d s tmelda n wass amaḍlan n tutlayt tayemmat min ijjin “Isuraf” ad tssers tutlayt tamaziɣt d asentel i wemṣawad d ucrac wawal jar imeɣnas d iselmaden-nneɣ ḥuma ad nssers merra imxumbal i tettaf tmaziɣt g ubrid n tyumi-nnes.
Mamc ttuɣa tssers Isuraf ijj n uprugram i ussan-a, tbedd ass amezwaru ɣer ijj n “uskasi d amyaɣ” ismun ja tarwa n tsaft d imucan i yudsen g ijj n umsawad xef tilalt n uddad amunan Amaziɣ di Arrif, s uɛecci ttuɣa-aneɣ deg umelqi ag ict n tseqqamut tesmun awal xef tutlayt tamaziɣt d ubrid n wugim
Ass wiss tnayen aked tuffut tuɣa din amelqi jar iḥudriyyen n tsaft akked ijn Tasawart i welmad n tira d tiɣri s tmaziɣt.
Aɛecci n wass-a tesmun-aneɣ ict n tinawt tusi-d d asenweji i yselmaden-nneɣ
Mass :Sifaw Lhani
Mass: Saɛid Lɛebbuti
Mass :Ɛebdlxaliq Uɛekki
Nesmun awal deg usentel : tasertit n tutlayt di arrif tidinamitin d icqirwen, d marra imxumbal n i taf tutlayt tamaziɣt tarifit g ubrid n tyumi-nnes.
Iwweḍ ucrac n wawal ɣer waṭṭas n tneqqidin d iseqsiten xef man abrid i yettrajan tmaziɣt? Niɣ man tmaziɣt umi ssewjaden i irifiyen?
D mani ggurent tisertay n tutlayt di Arrif?
Nkemmel amelqi-nneɣ s usgmed n sin idlisen d imaynuten n uselmad-nneɣ saɛid Lɛebbuti, awal danita xef : “Tisgnef n ujenna” d “Tɣuyyet n tallest”.
Amelqi-a ikkes ixemrawen x waqqan n tutlayt d iɣezdisen n tudert d mamec nzemmar ad nssiwel xef tutlayt tarifit d uterras arifi
Ad d-yass di min d igguren awal xef ussan-a ujar i manaya deg ict n tanaḍt di tasna n iṣuraf.
Asekki zi tmurgant n Isuraf.