Nnaḍur (TIFRAY) – Yenna unessixef n tyemmunt n Tmaziɣt di lḥizeb n PAM, Racid Buhedduz, ila Tmaziɣt jar 2026 d 2031, ɣer-s tnayen n ibriden, ma a tedder a tlul ɛawed di tmurt-nnes, niɣ ad azɣen iẓuran-nnes.
Aked uyenni, isiɣi iwekked, deg wemsawal i kid-s tegga Tifray, s tniɣt n usitem ila “ad ggen marra tizemmar x tudert n tmaziɣt”.
Am mamec i d-iydar lxedmet i yettwaggen deg “Agraw i Tmaziɣt” i ttuɣa yegga netta, yerni yenna ila “Agraw ittwagg di PAM deg idjen n wakud nufa belli lḥizb itteffeɣ x webrid-nnes, ismeḥ di tzemmar ttuɣa itteg x tmaziɣt“.
Deg useqsi-nni i das-nessers belli PAM, ittxes ad issexdem tawriqt n Tmaziɣt waha, yerr-d netta ila irezzu ula d inniḍen ad sxedmen tawriqt n Tmaziɣt ataɣ ad “ggen tizemmar ktar zi PAM”.
Amsawal-a i yettwaggen akked mass Racid Buhedduz, amɣar n tyemmunt n Tmaziɣt zɣer daxel i PAM, yettwaḥsab d amezwaru s Tmaziɣt aked ijjen zeg inni i yellan deg imulliten n seyyasa di Lmuɣrib.
Ha amsawal:
1. Min teɛna tastratijit n PAM ḥuma ad issemɣer zeg izerfan n Imaziɣen d Tmaziɣt?
PAM swami i ittwagg ttuɣa tmaziɣt ɣer-s d ijjen upilar ixes ad ibna tmagit-nnes, Tmaziɣt nettat d idjen uɣezdis imɣar zi lɛahed amaynu, nzemmer a nini nettat d tisit i zi nettwala lmuɣrib amaynu.
S minzi umi ittwagg PAM ttuɣa iksi s imunas ḥuma ad issuɛla di ccan n tmaziɣt ḥuma a teṭṭef amcan-nnes di tmurt-nnes, ur nettettu ca belli PAM ttuɣa-t d idjen useymi n tecli n “insaf w musalaha”, xmi neqqar “insaf w musalaha” aqqa tmaziɣt nettat iḥtajen “insaf” minzi tekkerfes aṭṭas di min yeɛdun.
2. Mamec ixeddem PAM deg usemhel (tteɛfil) n Tmaziɣt di temssugurin d tisertay timatutin?
PAM itteg tizemmar-nnes timeqqranin ḥuma ad ifeɛɛel tmaziɣt di “ssiyasat l3umumiya”, zeg min ɣer-s d tizemmar, nessen ila PAM ttuɣa-t zeg imezwura i yewtin acbar x tmaziɣt umi ttuɣa-t di lmuɛaraḍa.
Ḥaca umi iṭṭef lḥukuma ikemmel abrid-nnes deg usersi n izerfan n usemhel, wanita d idjen n usenfar yemɣar mazal nessitim isuraf ɣer zzat.
3. Din wi iqqaren ila PAM isxeddam Tmaziɣt d tawriqt waha maci am ijjen (iltizam) n tidett s Tmaziɣt, min ɣa tinim i yina?
Awal-u nettesla-t aṭṭas, manaya ur yelli ca d lɛib, neqqar, maɛlik marra ad sxedmen tmaziɣt d tawriqt, nrezzu tmaziɣt a tili d tawriqt ɣer kulci. Kul yedjen ad yerni x wenneḍni.
Awal-u isbeyyan belli PAM zeg imezwura i iksin tmaziɣt d amnus. Neqqar-asen, i mayemmi ur tt-tkessim kenniw d tawriqt uca eggem tizemmar kter zi PAM bac a tbanem d imezwura.
Aseqsi-nnek x “iltizam”, manaya d lxedmet d tiwtca i x-s ɣa yerren.
4. Min teɛna lxezrat-nnwem i Tmaziɣt jer 2026-2031?
Amezwaru nessitim lḥukuma i d-yusin a tt-iṭṭef PAM. Netcin a negg marra tizemmar maḥend ad yili akud-nni d akud n ureɣ i tmaziɣt, zi lebda nkessi axarres belli tmaziɣt ixess ad tili tamzwarut di kulci di tmurt nnes, am nettat am teɛrabt di kullec.
Ɛawed nessitim ad yili ijjen lferz isebḥen i tmazight ḥuma a negg wul di merra Imaziɣen d imeɣrabiyen ḥuma ad tt-lemden ad tt-ɣren.
Jar 2026 d 2031, Tmaziɣt ɣer-s tnayen n ibriden, ma a tedder a tlul ɛawed di tmurt-nnes, niɣ ad azɣen iẓuran-nnes, netcin a negg marra tizemmar-nneɣ i tudert n tmaziɣt, minzi mala truḥ tmaziɣt ittraḥ Lmeɣrib amen imun ittqessa iẓuran ittweḍḍer ula d amuni-nnes ittemsebḍa
5. Min ibeddel “Agraw i Tmaziɣt” di PAM?
Agraw ittwagg di PAM deg idjen n wakud nufa belli lḥizb itteffeɣ x webrid-nnes, ismeḥ di tzemmar ttuɣa itteg x tmaziɣt, netcin numen zi tdimukratit, negga agraw nmun, negga tizemmar maḥend ad dd-nerr tarya n lḥizb ɣer webrid-nnes di min iqqnen ɣer tmaziɣt.
Yemɣar-ayi ccan ad iliɣ d amɣar n “Agraw”, neṭṭef acbar x tmaziɣt zi daxxel n lḥizb, igga tawriqt i wegraw aneggaru, issers-itt s uɣil, nuweḍ a negg tayemmunt n tmaziɣt di lḥizeb, d nnec i yellan d amɣar-nnes ɛawd, uca aqa nttegg tizemmar d isuraf-nneɣ maḥend a newwec ixarrisen d tzemmar bac a nessuɛla zi tmaziɣt