AFP (Tifray) – Kṭer zi melyar n bnadem deg Wasiya, tteggen ficta deg ussan-a i yeɛdan, “s useggʷas n wayur amaynu d beddu n useggʷas n ufiɣer”, ficta-ya tteggen dag-s aṭṭas n leɛwayed zi Pikin ar Pankuk.
Ittili ɣer Icinwiyen ijjen bakansi dag-s tmeniyyam, i di ttmelqan x ijjen ṭṭabla n macca, ssujaden ca n leɛwayed, ḍellqen i lmicc ḥuma ad wesqen lejnun d laryaḥ iɛeffanen.
Bbeɣbɣen istasyunen n macinat d izagʷzen di tmurt n Ccinwa zegga ttyarita aked wedwal n imelyunen n yewdan ɣer tmurt-nnsen ḥuma ad sseɛdan bakansi aked leḥbab-nnsen.
Waxxa ttuɣa yella usemmiḍ di Pikin, ula kter wami tehwa tirɣi ɣer 10 sadu i ziru, raḥen iwdan ɣer tbeḥḥar d mani ttẓallan ḥuma ad msafaḍen aked useggʷas n udragun s tẓallit, amen xezzren di ccḍiḥ i yettwaggen.
Tedla tezweɣ i d-isskanen ɣer wagla d lefraḥet, ammasen n leswaq d tudrin, aya maci ḥa di Cccinwa waha maca ula di ca n iɣezdisa zeg wasya d yeffus-nnes d usammer-nnes, nettaf g-s Kuriya n yeffus d Singapur d Viyitnam d Ṭayland.
Di Viytinam, munent twacunin ḥuma ad d-fekkrent lejdud-nnsent i yemmuten s ca n tufqitin n lbanan, waxxa ca zzag-sen rzun x ca n tmeslayin-nneḍni ɛlaḥsab liɣla i yellan.
Ḥaca di Ṭaywan, hrubbzen-d iwdan ḥuma ad ẓallen, ad wcen tufqitin-nnsen s fruttat d ɣayyiṭa d weɣẓaẓ.
Maca di Pankuk, feyyen-d aṭṭas n lɣaci zeg imezdaɣ d imallayen ɣer usumeɣ n Mangkun Kamalawat, i yellan zeg isumɣen ibudiyen icinwiyen imeqqranen di tmaẓunt n Ṭayland.
Maca hwan-d xirebbi n yewdan di tmaẓunt Tafilippinit d Tindunisit, Manilla d Jakarta, ḥuma ad furrjen di ccḍiḥ n wayrad.
Beṭṭan yewdan di leɛyud-a, ttmenyat x tarwa-nnsen i wer yercilen. Tteggen-tent di ca n “ijwawen d izeggʷaɣen”, maca umi tella tatiknulujit, smuttuyen ttmenyat ḥa s ttilifun waha.
Ttrajan ila Ccinwa iggur ad tẓer di rebɛinyum qbel i leɛyud ca n tesɛa melyar n umuddu jer imukan.
Tessken-d xinsiya n Ccinwa tamaynut (Xinhua) belli imudduten s ṭṭiyarat d macinat ad yaweḍ aseggʷas-a ɣer ca n iswiren ɛemmers wer ɣer-sen iwwiḍ qbel.