Deg iseggusa-ya ineggura, aṭṭas n legnus i dd-ikkren aked weyduden icemlalen, maḥend a dasen-ttlaɣan s yisemawen-nsen maci s yisem i dasen-ggin. Di 15 n iseggusa yeɛdan, aṭṭas n iɣewwiɣen imassanen ittwaxelqen x manaya. “Necc qqaren-ayi Sinti niɣ Roma”, “Necc d aberkan maci d N*”, “Neccin qqaren-aneɣ inuit”. di tmura n wuruppa, aṭṭas ibeddlen, aṭṭas n yismawen n leḥwayej beddlen-ten, mamek ɛedlen imawalen i ɣer-sen ttuɣa rcan.
Al mani d ij n wass, ifaq-dd umaziɣ, yufa ixef-nnes weḥḥdes jer legnus n umaḍal, umi ttlaɣan s yisem ggin-as-t, yufa ixef-nnes netta simant-nnes, ittsemma ixef-nnes jer midden, s yisem urid-nnes. Izewweq-it cwayt ileḥḥen-as cwayt waha, ij n twalat yerni-as accent, ij n twalat ittekkes-as-t. Bérber, Berberisch, s taɛrabt barbar.
Mani dd-yemmers useqsi n mamek dayi-qqaren, d min ɛniɣ, imun-dd akid-s useqsi n mamek tt-ɣa-nari. Maca qbel ma a naweḍ ɣer tira, mani yiweḍ wawal-nni aɛeffan?
Abrid d azegrar, maca qa neggur!
Samira beleyouaou i yellan d tameɣnast deg uliman, tebda-tt s instagram nnes Amazigh_Xberberin, isem yexsen ad Ex-Berber. Nhara d tamɣart n tmesmunt Amazigh Akademie e.V. deg Uliman. Teqqar belli awal n Berber aqqa-t deg umawal n uliman “Duden” yewta din iẓewran, d wenni d awal unsib i zi ssawalen ilimaniyyen x imaziɣen, “Maca lexxu llan aṭṭas imaziɣen i itteggen tasebbabt, sxeddamen kter awal Maziɣ, mamek la d ca n imukan n ddewla am ij n tsenniɣt di Frankfurt (Museum)”
Maca Samira tettwala belli isem Maziɣ: “wer iɛddel mliḥ s tlimant, suyenni nedwel ɣer lxezrat n Dr. Tilmatine, i yennan di 90nat ixessa a nari “masirisch”, “masirisch” minzi ad yeɛdel s usistim n lluɣa talimant.”
Nesseqsa Samira Beleyouaou x Cḥal yeqqimen ɛad n lxedmen? tenna belli di sspanya s umedya niwed ad sidfen “amazig” ɣa lluɣa n tsepanyut, sxeddamen issem-a deg waṭṭas n imukan n ddewla d tmesmunin. “Macca yeqim ɛad attas n lxedmet ɣer zzat.”
“Ḥuma ad yadef amazigh, amazig niɣ masirisch ɣer imawalen n lluɣat n Wurrupa ixsa a nessexdem awal Maziɣ di tira, ḥuma a t-ssidfen deg imawalen i lexikuɣfen d ilangwisten (Imussnawen n imawalen, d imesnilsen). Sminzi nitni ssadafen iwalen i sxeddamen iwdan.” tenna Samira.
Tuɣɣensa n imeɣnas imaziɣen deg uliman d taqdimt urid tban-dd iḍa, jer usfaqi i imaziɣen i din yeddren. Maca al mani d yiḍa, i bdant ttbanent-idd tmijjawin i yeqqaren i i Wuruppa, wer daneɣ ttlaɣam ca Berber. laɣam-aneɣ s yisem-nneɣ, i negga i yixef-nneɣ, i nexs i yixef-nneɣ. Maci s yisem texsem kenniw. Samira teqqar belli amenɣi ɛad d azegrar, “Izwi (Lhaddaf) amzwar: ad yili amazigh niɣ masirisch di Duden. Ḥuma ad yili di Duden ixxsa mara iḍrisen) i yessawalen x imaziɣen ad ksen x “Berber.”
Tilmatine yufa-s ddwa
Tira izwarent i wenhezzi n imaziɣen n diaspura di min yeqqnen ɣer manaya. Amxumbel-a igga deg-s ij n trezzut Dr. Mohand Tilmatine deg 1998. qqaren-as Una cuestión de denominación:?` bereber, amazigh o amazige? Tilmatine di lweqt-nni, yenna belli awal n “Berber” wer yeqqim ca nzemmar a zeg-s nessiwel x imezdaɣ n tqiccit n tefriqt. Awal “Amaziɣ” ittraɣ ɣir min tsxeddamen iwdan, ula deg uruppa. Amek imaziɣen ttraḥen ɣir min lemmden ad ssnen ixef-nsen min ɛnan.
Amxumbel i ttuɣa yettwala Dr. tilmatine di lweqt-nni, lami di tseppanyut ttuɣa wer din ca n furma msafaqen x-as, mamek ɣa arin awal Maziɣ. D mamek t ɣa sseftan, amyijjen amwaṭṭas, Amxumbel-a yegga-s Dr. Tilmatine di trezzut-a nnes asemquddi d amezwar aked ismawen n legnus nniḍen am Aɛraben, niɣ ilimaniyyen. Aliman ittsemma ixef-nnes Deutsch, ɛedlen-t awal di tseppanyunt, ggin-as Alemán, Arabé deg wemkan n “Al-‘arabiyya”.
Amxumbel yellan taseppanyut, wer deg-s bu asekkil n “Ɣ” suyenni ixess-as i yisem Amaziɣ asefsi di tutlayt taseppanyut s min deg-s d isekkilen-nnes. mamek ɣa yeɛdel yisem-a ad yessefta ad yefrez awtem tawtemt amwaṭṭas…
Dr. Tilmatin Yerra x useqsi-ya s ij n wufuɣ, ittwala deg-s Amazige d wenni d lḥell i wemxumbel-a.
Di Talimant yefser Dr. Tilmatine deg 1995 [1] tarezzut-nnes d wufuɣ i das yegga i wemxumbel-a. Yenna belli awal maziɣ ixessa ad ibeddel di tira d izerfan n tmurfulujt di tilimant, “A” n wewtem, d t n tewtemt ixessa ad ksen, ittɣima weẓwar M(A)Z(i)GH. Di tlimant Z ittwanṭaq d (tz), suyenni ixessa ad yari (s) ittwanṭaqen d Z. Amenni la d gh, ad yedwel d (R) _minzi talimant la d nettat wer tferrez jer ɣ d r_
Manaya yejjin Dr. Tilmatine ad yessers awal “MASIR”, ad t-iserref x izerfan n tlimant a zzeg-s yegg marra min neḥwaj i tira d wawal.
Zi tira ɣer ca nniḍen.
Tibridin n tira d wawal, llant zeg 1995, maca maziɣ ittqeddmen ixef-nnes jer yewdan n midden s Berber, tutlayt-nnes s Berbisch, niɣ berber-language, yugi ma ad yeqḍa. Maya nettaf-it jer imaziɣen i yellan ssnen, ssnen belli Berber d ij n wawal d aɛeffan.
Maca din wi yettwalan belli awal n Berber ixessa ad yeqqim, minzi marra min yurin d amezruy, yura x “berber”, ɣerzzu yettwagg di “les berbers”. Khalid Bouyaala ittseqsa deg ij nwartikel yettwafsar x Tifray di 17.08.2020, ma zemmarnt ddewlat d imukan-nsent, am takademit berber ad beddlent deg yedlisen iqdimen, marra mani yella berber s amazigh?
Bouyaala ittwala belli “Di tidet merra manawya d aqessi i yẓewran, maḥend amaziɣ n tiwecca wer ɣer-s ittili umxumbel akked yinni yeṭṭfen leḥkam.”
Maca aṭṭas n imaziɣen wer ssinen Bouyaala wer ssinen Tilmatine ula d Beleyouaou, snnen ixef-nsen d imaziɣen, ttseqsan mayemmi wer ten-ittsemmi umaḍal s yisem-nsen. Aṭṭas n imaziɣen yeddren di Arrif, wer ssinen awal n Berber belli yella. Snen ixef-nsen d imaziɣen waha.
[1] „zum wortpaar »berber« – »amazigh«. ein beitrag zur terminologischen vereinheitlichung und klärung eines nicht lexikalisierten terminus.“, in: muttersprache. vierteljahresschrift für deutsche sprache, gesellschaft für deutsche sprache (gfds). wiesbaden,1995 (heft 1/105).