Deg wass n 13 yulyuz 2016 i di d-yehwa Ḥmed Ziyyani x uyis n tudert. Tamettant-nnes qqimen dag-s iwdan reẓmen aqemmum. La d ijjen ma ttuɣa yettɣil ila Ziyyani ad immet d netta ɛad d ameẓẓyan. Jarkter tuɣa wer yekki walu x lmewt n Caca, ameddukel-nnes deg Ulanda.
Ḥmed i dd-ilulen deg useggʷas n 1954 di teqbilt n Ayt Sɛid, itleɛ ɣer tmurt n Ulanḍa deg useggʷas n 1979 maḥend ad yirzu x uleqquz n weɣrum. Deg issgusa n 90 ad d-issufeɣ amud-nnes amezwaru “ad ariɣ deg weẓru”. ad t-isseḍfar s ijjen nniḍen “talewliwet i mulay”. Ad ikemmel s “iɣembab irezzun x wudem-nnsen deg wudem n waman”.
Tiqessisin n Ziyyani ttwaɣennjent zeg waṭṭas n tseḍmiwin n Arrif, mamec ttwaggent tiɣuriwin x-as. Yettwaḥsab Ziyyani zeg wudmawen n tsekla Tarifiyt i ɛemmar-s ad tttwattun niɣ ad nnsefḍen.