Deg ussan yeɛdun yemser waṭṭas n wawal jer Irifiyyen belli Aliman, ixes ad yerẓem i ixeddamen zi barra. Niɣ mamek qqarn s wawal n leqhawi: Aliman ad yerẓem i lekwaɣeḍ. Deg umegraḍ anekkes afray x uneɣmis‑a (Lexbar), a nessen tidet, deg ixarriqen.
Pulitik n wenɛarq deg uliman tella zeg wami yella Uliman, deg ineggura‑ya n iseggusa, tedwel d ijj n ṭṭema labud a x‑as yili wawal melmi reccḥen i lintixab. Igrawen marra tteggen‑tt deg uprugram‑nsen, Jer wenni yexsen imenneɛraq, d wenni yexsen ad yazzel x yinni da, marra qat ɣer‑sen d ij n lkartet ttiraren zeg‑sen.
Lḥukuma n useggwasa, tettwassen s “Ampel” , i yexsen ad yini sṭup n yebriden, izegzawen n twennaḍt (Envirement), Spd (Agraw asusyal, azeggwaɣ) FDP (ilibiraliyyen, awraɣ), Igrawen‑a msafaqen x waṭṭas n tmeslayin, munen mani wer yettmun ḥed, minzi lxezrat‑nsen temsebḍa deg waṭṭas n tmeslayin. Zi min xef firmarn, d lqanun amaynu n wenɛarq.Kunṭra‑ya, tiwi‑asen‑dd aṭṭas n ukritik zeg igrawen‑nneɣni, d waṭṭasn Ilimaniyyen,
1- D amezwar, inni yellan deg uliman
Aṭṭas n imenneɛraq deg iseggusa yeɛdun, inni d irewlen zeg iɣewwiɣen d umquṭṭes, niɣ iḍriben, d yenni wer ɣer llin lekwaɣeḍ. Ssa d usawen ad x‑asen yehwen lḥal. Aṭaf zemmern ad ggen lekwaɣeḍ, wer ttɣimin mkul twalat tticen‑asen sett‑chur niɣ d ɛam n visa waha. Min isseqsiḥen afsay deg wamun aliman, xsen ad teksen. Iwdan‑a ad yedwel ɣer‑sen lḥeq ad xedmen. A ten‑ɛayaren s lekwaɣeḍ umi semman “lekwaɣeḍ n ujarreb”. Di lweqt nni di ten‑ɣa‑jarrben, ixessa ad ḍebbren x uzellif‑nsen, ad afen lxedmet.
Kritik: Agraw n merkel (CDU), ittwala wa d acejjeɛ x ukular ɣer Uliman, wer yettɣimi manaya deg yenni da waha, maca ad mmernin inneɣni.
2 – Ljinsiya deɣya, bla ibuda
Ampel txes ad tessehwen lqanun n ljinsiyya. Ssa d usawen ataf aweni xemsa n iseggusa deg uliman, izemmar utarras ad yegg ljinsiyya. Wenni dd‑ɣa‑ifesyen (Integration) mliḥ deg wamun Aliman, izemmer adyeksi passpurt Aliman di telt‑snin. Lqanun yellan lexxu, yeqqar temn‑snin.
Amec tamunt‑a n yegrawen txes ad tbeddel lqanun, ataf iwdan xmi ɣa ksin passpurt Aliman, zemmern a ɣer‑sen jjen passpurt n tmurt‑nsen (ljinsiya dubli). Midden ixelqen da ɛawed, ixessa a x‑asen yehwen ad cerken deg upulitik Uliman.
3- Afessel di lqanun n ixeddamen zi barra
Tamunt n yegrawen iḥekkmen aliman, xsen ad ggen ij n usistim d jjdid i ixeddamen yexsen ad adfen zi barra ad xedmen zeg Uliman. Xsen ad ggen ij n usistim am Green Card n Kanada. Asistim yebna x tneqqiḍin, Maca deg Uliman ɛad wer nnin man tneqqiḍin (ccuruṭ) i xef ɣa yebna usistim‑a. Zeg ij n uɣeẓḍis nneɣni, xsen ad shewnen asemquddi n ddiplumat n barra deg Uliman.
4- Asidef n Familiyya
Asidef Familiya xsen ad tsehwen x yeḍriben, Wenni ɣa yeksin llujuē deg uliman, Ataf izemmer ad yessidef tamɣart‑nnes, d iḥenjiren‑nnes wer ywiḍen 18 iseggusa. Lqanun‑a ad iɛawen aṭṭas n Isuriyyen d Afɣanat, i yejjin lwallay‑nsen di lxaṭar.
Tina d ca waha zi tneqqiḍin i yemmarsen di kunṭra n lqanun n jjdid n imenneɛraq. Min yecqarn Irifiyyen d dyaspura, d Punktu amezwar d wiss 2, maca ixessa ad rajan cwayt ar dd‑ɣa‑yban ufessel n lqanun‑nican. Ataf ad ssnen ma zemmern ad ggen lekwaɣeḍ ma lla. Maḥend ad awyen tteḥqiq di manaya, ixessa ad sseqsan ibuɣawen ittkellfen s yemxumbal n imenneɛraq. Zemmern a ten‑ɛawnen s waṭṭas.
Irifiyyen n Arif, ixessa ad rajan maḥend ad iban man Ipunktuten i ɣa‑yettwaggen i usidef n ixeddamen. Ssa ar din ɛad wer din bu ca n lxebar, x ma ad ssidfen zi dduniyt marra, ma zi ca n tmura waha? ad rren taynit i ddiplumat kṭar zi ssenɛet? Min ɣa yeqqimen d awal x manaya, ad yili marra d awal waha, lexber n tidet ad iban di min dd‑yegguren n wussan.