Tessufeɣ-d ijjen tmurgant ijjen uneqqis di Mlilet, tenna-d belli 30 n imenneɛraq mmuten di arrbeɛ amezwaru n useggʷas-a amen ttexsen ad awḍen ɣer Mlilet x webrid n lebḥer s ijjen tebridt wer telli d tazerfant.
Tettwala tmurgant n Solidary Wheels belli “affay-a i isiɣan n imettinen” yus-d minzi dewlen aṭṭas n imxumbal maḥend iwdan ad awḍen ɣer yebriden izerfanen.
Teddettet tmurgant n Solidary Wheels deg ijjen usiweḍ-nnes d aneɣmas, ila 32 n imettinen ɣer iftasen n Mlilet d Bni Nsar jer yennayer d mars 2024, azgen ameqqran n imettinen-a d imeɣrabiyen, celxen di lebḥer s mezri n wawaḍ ɣer Spanya.
Teqqar Solidary Wheels ila ddegg-a n ẓekku “yeqqseḥ aṭṭas”, minzi izemmer ad yaweḍ ar 08 n sswayeɛ, ittili s llilet “ḥuma ad anfen i tɣarruba n Guardia Civil, wer ten-tterrin”. Xelli ca zzag-sen ttuɣa-ten deg ifantumen, ttexsen ad awḍen cal aspanyu.
Wer das-iɛjib bu lḥal Solidary Wheels wami dewlen imenneɛraq tteggen uɣil xaf-sen ad menɛen iberiden-nni i wer yellin ca d izerfanen.
Temmel-d tmurgant-a belli imestfaqen jer Spaniya d Lmuɣrib d nitni i yejjin abeddel-a deg yebriden n weɛraq d liɣla n ifantumen ig ittakkʷaḍen ar 10 000 Euro; ɛawed d usedwes n laman x tnayen n tmewwua n fruntira zeg wami yemser wengaz-nni n imenneɛraq x sslek n Mlilet mani ttuɣa mmuten 23 n imenneɛraq, maca timesmunin qqarent ila qa wwḍen imettinen ca n 37, ɛlaḥsab aneqqis-a lebda.