Twalat ɣer twalat, nttesla x imuddar ttrun xmi yettmetta ca n yijj zeg uklasi‑nsen. D tidet? Ttacan lewḥuc s uxiyyeq? Di min ẓrin yenni yeḥḍan imuddar, ibaɣusen (leqruḍ) d d lfil, d nitni waha idd‑ksin ttrun xmi ttafen ca n ḥedd zzag‑sen yemmut. Maca minzi ttacan? ma am neccin? niɣ d ca n weklasi‑nneɣni n uxiyyeq?!
iStock.com, FLCreativePhoto
Xmi yetmetta ca n Bnadem iɛizz x‑aneɣ, netxeyyeq, nettru, ntaca s ugezzim n beṭṭu. Mkul lgens zzag‑neɣ ɣer‑s tinamitin‑nnes itteg di lmut, ca ineḍḍer ca yesscmaḍ, ca itɣennej, ca yeqqar zeg iḍlisen n ujenna. Maca i lmal agnaw? ifehhem umi qqaren lmut? tessnen belli yemmut ca n yijj zzag‑sen?
Zi zik n wussan, nettwaḥsab weḥḥedneɣ (iwḍan) d aklasi n imuddar yellan sennej i tmurt, yessnen belli lmut tella. Maca mkul twalat ad treɣ ca n tfawt ad daneɣ temmer ca n tidet ila wer tt‑nessin. xelli la d ca zeg imudar, ttacan s lmut, urid am neccin, maca s tebridt‑nsen.
Lfil wer itettu‑ la d imeṭṭan‑nnes
Zeg imudar wer ittettun imettan‑nnes, d lfil. Aṭṭas n twaratin ẓrin‑ten ‑inni iterran taynit i min yeddren di lexla‑ wer ttilin ca nurmal xmi ttadsen ca n jjifet‑nes.
“neẓra belli xmi ttadsen ca n yij zzag‑sen yemmut, ttḥadan‑t, ttadsen‑tt, tbeɛɛaden xa-s, as tinid teggen lankit. Taynit‑a n lfil ɣer imettan‑nsen, waxxa wer ten‑udisen, wer dasen dd‑ttisen ” teqqar: Shifra Goldenberg zeg usinag n Smithsonian Conservation Biology.
Ca zi lfilat‑a, ggin tizemmar ad sbedden jjifet‑nni, niɣ ad t‑idd‑jebden ɣer‑sen. Aṭṭas mani twaẓren ɛawed, tcemmamen ḥima ad ɛeqlen wi zzag‑sen yemmuten,
iStock.com, brittak
Wa d axiyyeq?
I xenni, ma ttacan s uxiyyeq ma lla? Godenberg teqqar belli yeqsaḥ ad nessen minzi ttacan. Maca aṭṭas n tyacitin i dd‑ibanen. Ruḥ ased, acemcem d uḥadi, manaya aṭṭas n tyacitin dag‑s yeffren.
Lfil yettwassen s ladas i twacunt nnes. Tamunt i ytekken ɛecrayat n iseggusa. Ḥeṭṭu yemmal belli waxxa msebḍan jer‑asen, ttemseɛqalen melmi ɣa mselqan ɛawed. Xmi ttemsagarn, tcemcimen, ttemḥadan. As‑tinid kessin tifraz i wayawya.
Ibyulujen qqaren belli tamslayt d ict xmi zzag‑sen yetmetta ca n yijj. “Min teggen amenni, tsejjlen‑tt zzag‑s belli yemmut. ḥima ad snen belli wer yeqqim yella.”
Tibaɣusin d tarwa‑nsent
Ibaɣusen msebdan di mamec tteggen akd lmut. Gurlilla tettɣima‑as ɣer uzellif, tnebbi‑as. Acimpanzi yeddal lmiyyet‑nnes s tefray n lesjur, tayemmat n ubabun (Baboon) trebu‑t x weɛrur ar zzag‑s ɣer teqḍeɛ layas. Ibaɣusen mara as‑tinid wer ttimnen belli yemmut‑asen ḥedd zi tarwa‑nsen.
Ma wer tesnent tyemmatin‑a belli mmit‑sent yemmut? Alecia Carter zi tesdawit n Montpellier teḥḍa akd imeddukal nnes mliḥ ibaɣusen. Zrin belli tayemmat n ubabun wer das tetteg i memmis yemmuten amen tetteg i yenni yeddren. Ufin: “tettjarra‑t zeg ufus niɣ zeg uḍar waha. Ajarri nni ɛemmars ma yeggi‑t weklasi‑nnes i ca n yijj zi tarwa‑nnes amen yedder.”
Ibyulujen ttwalan, tɣuni jer tbarɣust d tarwa‑nnes wer tbeṭṭu s lmut. Snen belli yemmut, dag‑sen adeqqi am wenni day‑neɣ (iwdan). “Tɣuni texleq ij n twalat, teqsaḥ i beṭṭu” teqqar Carter.
Ma d axiyyeq, ma d ca nniḍen? Ma yerwes di tyacit n yewdan ? wer tessin Alicia Carter. Minzi tyacit‑a uḥren ma ad teɣren wer das ufin lfihem. Maca ttwarrit x useqsi‑ya, ɛad wer tnufi, maca ict, “lmut wer tsseɣlayen ca tuzzel”
Ɣer ɛawed: Adan n tmurt, zemmaren ad ac-dd-qelɛen ul, maca ha min umi neffɛen.