Ttuɣa-ayi d ameẓẓyan ɛad, ad yili ca n 18 n iseggusa zi mani. Ḥeḍreɣ deg ijjen tmeddit n tẓuri di Miḍar, icrek deg-s Sullit.
Yuley-d s tquba-nnes, s ibwantisen qessen, isslufa i tgiṭart s iḍuḍan-nnes, s ict tiɣist d tmijja i yessuren aked leḥriq d iwezwizen i zi iɣennej iɣennijen n tawmat d usitem d tnezbayt.
“Maca maɣar”, “tawmat-inu”, d “neccin d imaziɣen”.. Ddegg-a n iɣennijen, ila ggin ameknaw isennanen ttejjun-aneɣ, ɛerrnen-aneɣ a nessen a nessers iseqsan.
Xenni, wwḍeɣ ad ssneɣ ijjen artista-nneḍni, Buɛali “aderɣal”, uca tmunit jer ijjen d azeḥḥaf, wenniḍen d aderɣal, tettejja-ayi ad ttbehḍeɣ; mamec ineɛḍab-a, dewlen d artistat? Aya deg ijjen tmurt, wer dasen-d-terri lexbar ila llan qaɛ.
Tnayen-a n artistat: illa ssakkʷaḍen-aneɣ-d ijjen tebrat tefsus, teqqseḥ di twalat d icten: “Aneɛḍub, d aneɛḍub n walli, n buḥbel, urid d wenni innɛeḍben zi arrimet-nnes”.
Nec, xenni, ila qqareɣ amezruy, uca manaya yejja-ayi ad afeɣ iseqsan iseggmen, iscukkuḍen: “Ma amezruy-nni neqqar d tidett?”, “Mayemmi wer daneɣ-slemmiden Tmaziɣt?”.
Awern-as, aṭṭas n twalatin i mmelqiɣ aked Sullit di tmedditin i ggint tmesmunin, niɣ ula di tinni n Umussu Adelsan Amaziɣ di tesdawiyin.
Maca, ɛemmers wer kid-s qqimeɣ. Ɛemmers wer t-sseqsiɣ, wer das-sliɣ, ula d yemsawalen i kid-s ggin isaḥafiyen-nniḍen, wer umisen ijjen lallaɣ n ijjen artista, d ameɣnas, yedder x tma.
Luxa, zegga yemmut, wer sxarriqeɣ ila tettaɣ-ayi tfeqqeɛt, ttnefgaɛeɣ di mamek neccin, ittic-aneɣ lxaḍer-nneɣ, a nettu artistat i yewcin buḥbel-nsen i Tmaziɣt, i Arrif.
A nettu Qusmit, Lmeḥdali, Ḥmed Zeyyani, Caca…
Ca n twalatin, neddekkʷal, nettseqsa ddegg-a n iseqsan i wer iḍbiɛen, ar ɣa yemmet ḥedd. Amenni ggin, inni dayi-yezwaren aked Sellam Arifi, i ggiɣ nec ula aked Qusmit wami yemmut.
Ḥaca, aṭṭas n twalatin, yewdan tettaɣ-iten tagnawt, ttagin ad wcen ula d awal-nsen di lḥeqq n wennḍen, xelli wenni, ikmeḍ ḥma ad issreɣ yenniḍen.
Iwa ha luxa, Sullit, yemmut..
Yemmut ijjen lmewt teqqseḥ, tettegg leḥriq, tettezzem-aneɣ, tyezzem, tessendaf..
D wa d Sullit, i skemḍen! D netta i ttuɣa illan d tcumɛet yekmeḍ luluf n twalatin, ḥuma ad aneɣ-issreɣ tfawt i neccin.
Sullit-nni ila ittɛecciqen di giṭarat d netta d ameẓẓyan, ittxes s minzi mma ad iɣennej.
Sullit-nni i yeggin taseḍma n Tidɣin deg iseggusa n tesɛin, iɣennej, yewta acbar x Tmaziɣt..
Sullit-nni, umi yeswiza aked Imaziɣen n Leqbayel di beddu n walfayen, deg ijjen uftisibal di Biyya, ḥeqqen akid-s, wtin x-as wer iɛeddi i waṭṭas n lweqt.
Sullit buharmunika, wenni irezzun x min yeknan gi tudert, ad aneɣ-d-iwwec neccin d llɣawat i yiẓiḍen, ibbeɣbɣen s tebratin d wemnus.
Sullit ikemḍen di arrimet.
Sullit-nni, i yemmuten ass-a, ad yeqqim yedder i lebda, s tcuni-nnes, s iɣennijen-nnes, s tmijja-nnes, s uzmummeg-nnes, s tquba-nnes, d wudem-nnes..
D wenni netta a Sullit.