Tira n tmaziɣt n Arif  –Tazelɣa n wurmir d wurmir ussid ad

Yura-t: Khalid Bouyaala

1. Min teɛna tzelɣa ad ? 

Tazelɣa ad, tettas-dd lebda qbel i wemyagg xmi yettili yessefta deg urmir ( amaknaw di : ad cceɣ, ad sweɣ, ad irareɣ) niɣ deg urmir ussid (amaknaw di : ad ttetteɣ, ad sesseɣ, ad ttirareɣ). Tazelɣa-ya d wurmir, nesxeddam-iten xmi i nxes a nessiwel x yijj n lḥajjet ɛad wer tebdi, tzemmer ad tili, mamec wer tzemmer ad tili ; tezmar ad tili d asitem, d asefhem n mamec i nexs a negg ca n laḥajet……

Imaknawen :

Maḥend ad teswejded seksu :Ad tfetled seksu, a s-tegged xizzu d …… ;

Ruḥeɣ ad sessweɣ iḍennaḍ ufiɣ tarya tuzeɣ ;

Ad raḥeɣ ɣer ssuq n Temsaman tiwecca

• Cḥal i ɣer-s n wudemawen ? melmi i yettili wa ? melmi d wenneɣni ?

Ɣer-s tlata n wudemawen : ad, a d ɣa.

• ad 

Tettili d ad xmi wer ittili walu jer-as-dd d wemyagg, kkes ɣer udem amezwaru umagut i yellan ittili d a (uca a nzer mayemmi).

Imedyaten :

		ad + urmir	ad + Urmir ussid
Amyijjen	Udem 1Udem 2Udem 3 awtemUdem 3 tawtemt	ad awḍeɣad tawḍedad yaweḍad taweḍ	ad ttawḍeɣad tettawḍedad ittaweḍad tettaweḍ
Amagut	Udem 1Udem 2 awtemUdem 2 tawtemtUdem 3 awtem Udem 3 tawtemt	a naweḍad tawḍemad tawḍemtad awḍenad awḍent	a nettaweḍad tettawḍemad tettawḍemtad awḍenad awḍent

Xmi i yettemsagar d n ad akked t tettili tawayt : d+t = [tt] ( t tdeḥḥa tessed) deg udmawen usefti : 

• 2 n wemyijjen,  am di : ad tawḍed →[attawḍeḍ]
• 3 n tewtemt n wemyijjen, am di : ad taweḍ →[attawed];
•  2 n wewtem umagut, am di : ad tawḍem →[attawḍem] ;
• 2 n tewtemt umagut, am di : ad tawḍemt →[attawḍent].

→ Di tira, nettari ad ikmel d t n wudemawen usefti.

• a 

ad, tettili d a waha (bla d) di:

1. Xmi i dd-tettas qbel i wemyagg deg udem-nnes usefti umezwaru umagut.

Amaknaw di : 

      a necc 

      a nbeddel

      a nettafes

      a nteqqen

→ Di tira, a tt-nejj mamec i tella, d a waha bla d.

Mayemmi? 

1. Wer ɣer-neɣ min daneɣ-ɣa-yejjen a tt-nari d ad, minzi di tmaziɣin merra (mani i nesxeddam ad ) d a waha ! 
2. Wer ɣer-neɣ bu min daneɣ-ɣa-yejjen a nefhem illa d tawayt ! (n yettɣima d n wer yessid ca, wer ideḥḥi d nn).
3. Mala nura-t d ad (s d), a daneɣ-yegg imxumbal di teɣri ; minzi di lqaleb n ad+amyagg i ibeddan s n  (ad+n…. ), d yettwanṭaq.

Amaknaw di :

     Ad nɣeɣ [adnɣeɣ]

     Ad nedheɣ [adnedheɣ]

     ad nyeɣ [adnyeɣ]

• Xmi i dd-tettas tzelɣa usides dd jer ad d wemyagg :

Amaknaw di :

a dd-yas 

a dd-nawey

a dd-smunen

→ Di tira, a tt-nejj mamec i tella, d a waha bla d.

• Xmi i dd-tettas tenzeɣt jer ad d wemyagg:

Amaknaw di :

a ɣer-s raḥeɣ

a x-as kkeɣ

→ Di tira, a tt-nejj mamec i tella, d a waha bla d.

• Xmi i dd-ittas wezramyagg jer ad d wemyagg:

Amaknaw di :

a din iliɣ

a ssin kkeɣ

→ Di tira, a tt-nejj mamec i tella, d a waha bla d.

• Xmi i dd-ittas wusliɣ udmawan n wemyag jer ad d wemyagg:

Amaknaw di :

• a t-awyeɣ 
• a das-tinid

Di  (1) wa mala nura-t s ad yekmel, wer nesferriz jer wewtem d tewtemt minzi tettili tawayt jer d d t  (d+t = [tt]) 

Ad t-awyeɣ [attawyeɣ]

a tt-awyeɣ    [attawyeɣ]

Di (2), ɛawed xmi i ttemselqan d+d= [dd]

→ Di tira, a tt-nejj mamec i tella, d a waha bla d.

• ɣa

ad, tdeḥḥa d ɣa:

• Xmi i dd-tettas qbel i umaɣun 

Amaknaw di :

d netta i ɣa yeccen

Tlayetmas d Tmimunt i ɣa yettɣiman

• Xmi i dd-tettas zzat i umeqqim useqsay:

Amaknaw di :

Melmi ɣa traḥed Miḍar ?

Manis ɣa tekked ?

• Xmi i dd-tettas zzat i tesɣunt:

Amaknaw di :

xmi i dd ɣa yas 

mli dd ɣa ttawyen ….

ɣa,tneffeɛ, tettegged zeg-s a smessi (focalisation).

→ Di tira, nettari-tt mamec i tettwanṭaq ɣa. 

Wer din min daneɣ ɣa yejjen a tt-nari d ɣar minzi :

1 – S tfunitikt, wer nreẓẓem ca aqemmum xmi i tt-neneṭṭeq amaknaw di tenzeɣt ɣer (= [ɣaa]);

2- Tella ɣer imaziɣen-nneɣni, mani wer ttetten ca r, tettwanṭaq am di tmaziɣt irifiyen (ɣer yayt Mẓab, lebɛeḍ n yeqbayliyen…).