Ibedd umulli n PPS di Nnaḍur ɣer rebɛin yum n ugellin Muḥemmed Buzeyyan ass n lḥedd 26 nuwanbir i yeɛdun.
Ḥeḍren deg umelqi-ya aṭṭas n imeɣnas n PPS, mani i yennan awal-nnsen di lḥeqq n Muḥemmed Buzeyyan, i ttuɣa yudfen zeg wami yella d ameẓẓyan di tmesmunin, mamec yudef di seyyasa d ssandikat aked lxedmet-nnes deg yiger n tẓuri.
Issugur amelqi-ya dduktur Buleɛyun Muḥemmed d ca n imeddukal-nnes i kid-s imseddren, wcin merra awal-nnes s min iddren, ɛicen aked umeɣnas-a i daneɣ-yejjin amenɛad.
Aṭṭas n midden i yewcin awal-nnsen ameknaw dduktur Buddera arrayes i yeɛdan n Lḥusima, d netta i yettren ḥuma ad yili ijjen wass n tɣuri ḥma ad ttwazemmemnt lexdayem n Buzeyyan d tmuɣli-nnes d twiza-nnes i yegga deg ijjen wakud iqesḥen zeg umezruy n tmurt.
Wer yettu Mḥemmed Mira ula d netta ad iɣer ijjen tqessist i d-immalen asenḍi n ugellin, d netta issawal x umeddukel-nnes, ittɛawad tisebḥanin-nnes.
Zeg uɣezdis-nneḍni, issken-d Saɛid Lmusawi iɣezdisa ifawen deg uterras-a, yenna x-as belli netta zeg iwdan issersen ddsas i lxedmet n seyyasa d tussna di Nnaḍur. Mamec yegga fus-nnes ḥuma ad ttwaggent aṭṭas n tseḍmiwin n leɣnuj deg iseggusa n sebɛin d tmanin.
Amenni i ggin ula d Musṭafa Helhul d Ɛebdelziz Lweryaci i yessiwlen x wemkan ila ɣer-s ɣer ugellin-a, i ttuɣa yellan d ijjen zeg ipilaren n uɣennij Arifi amaziɣ amezdag.
Asinag ageldan n tussna Tamaziɣt, yekka x-as manaya axmi wer yelli, minzi wer ɛezzin agellin, wer das-wcin tasɣart-nnes deg usemɣer la di tudert-nnes amen di lmewt-nnes.
Ilaq a d-neydar, ila abani ameggaru n ugellin Muḥemmed Buzeyyan ttuɣa-t di Nnaḍur deg wayur n tɣuct 2022 wami tegga tmesmunt n Wasfeḍ ijjen ficta n usinyi n walbum n In Umaziɣ.