Nujna iggur ad tesseɛda bakansi-nnes ɣer baba-s ameqqran di lkampu, ila yuẓa ɣer-s lḥal. Yewwi-as-d Rebbi ila abrid ɣer baba-s ameqqran wer ittsili. Ḥa tiweḍ, traḥ ɣer wexxam i das-issujed jedd-s. Tenna:
– Walli min da ɣa ggeɣ! Tameddukelt-inu Lwiza, ayenni tiweḍ tettirar s yejdi n playa.
Maca qa jjennet n baba-s ameqqran, ila tella d taqiraḍt-nnes n lxuḍert. Ila ittnhella gi min itteẓẓu amenni, izemmer ad isseɛda aṭṭas n tseɛɛatin d netta ixezzer di lxuḍert-nnes leqqḥen, ssenḍayen.
Ijjen cwayt yenna-as:
– Nunja-inu, as-d ssu akid-i ɣer tqiraḍt, uca ffeɣ ad tirared deg wazzareg.
Teffeɣ-d Nunja amen teṭṭef ijjen ubuqal n tessawt, uca tebda tettrucca s waman. Tenna:
– Lebsel-a dag-s isennanen. Itteqqes. Taxsayt-a dag-s ci n ddegg n ccum!, i nec min dayi-iruḥen di manaya.
Ijjen cwayt, baba-s ameqqran yewwi-tt ɣer tebḥirt n sennej i taddart. Yenna-as:
– Xzar a yelli, ma tessned ila aɛeqqa-ya iggur ad aneɣ-d-iwwec tinifin. Ixess-as ḥa cwayt n waman, d ucal asebḥan d tfukt. Min tennid? ad t-teẓẓud?
Yewca-as baba-s ameqqran ijjen uqeddar d ijjen lbala d tameẓẓyant n ucal. Tegga s min das-inna jedd-s, maca wer das-iɛjib ca cal-nni ittenḥruṭṭfen jar waccar d uysum-nnes.
Yenna-as baba-s ameqqran:
– Uca ad t-teẓred imeqqar kul nnhar, ar ɣa yedwel d tacejjert.
Llilet-nni, teṭṭes Nunja amen teẓẓenfaḍ. Tenna aked ixef-nnes: “Luxa Lwiza aqqa-tt tettirar di playa”.
Tiwecca-nnes zik, isfaqq-dd usqaqi n uyaẓiḍ n wajjar-nnsen, timeẓẓuɣin-nnes i yeṭṭsen. Tenna:
– Mana amcum-a n uyaẓiḍ!
Amen tessemxerwaḍ iḍaren-nnes, tehwa ɣer kuzina, baba-s ameqqran ila yettraja-tt din. S lefraḥet yenna-as:
– Sbaḥ lxir a Nunja-inu, teṭṭsed mliḥ? Aqqa sswejdeɣ-am ijjen tcukulaṭi teḥma, maca ɣar-m a cem-tessekmeḍ! Iwa sew-itt ḥma ad traḥed ad tesswed aɛeqqa-nnem.
Teffeɣ-d zi taddart amen wer das-iɛjib bu lḥal tenna aked iman-nnes : “iwa maḥend aqqa-ay danita, ejj ad ssweɣ beɛda aɛeqqa-ya wa”. Teṭṭef abuqal n tessawt deg ufus-nnes, maca inḥeruṭṭef-as uqeddar-nni zeg ufus. Yefruri ɣar luluf n iceqfan.
– Ayyaw! Min ɣa yini baba ameqqran! Tfekker Nunja.
Ijjen cwayt tebda tettsela i ijjen ṣṣewt:
– Waaɛ, waaɛ
– Maca manis d-itteffeɣ ssewt-a, i tenna Nunja amen wer tumin tiṭṭawin-ines.
Ila d aɛeqqa-nni ameẓẓyan i yesɣuyyun amen yettneḍfas.
Tenna txizzut:
– Iwa bessif ad iru, qa yesmeḍ lḥal di berra.
Terni tenna:
– Ẓẓu-t da, ṭṭerf i tfukt, iwa deɣya.
Amen tennbheḍ, traḥ tuzzel Nunja maḥend ad teẓẓu aɛeqqa-nni jar txizzut d txesayt.
Maca tenna-as teṭumaṭict i Nunja:
– Ma tzemmred ad tleḥmed cwayt mala texsed. Qa teggid xaf-i tili, nec xseɣ ad summreɣ cwayt maḥend ad zewɣeɣ; qa ttrajiɣ baba-m ameqqran, ad ayi-issnen nhar-a.
Iban-d baba-s ameqqran, amen tesseɣḍ teṭumatict, ila yeksi-d ijjen wendu deg ifassen-nnes. Yenna-as:
– Ttwaliɣ ila temlussned aked lxuḍret-inu zixenta! Iwa ɛawen-ayi ad ixḍareɣ tinni issenḍyen. Ass-a yeggur a nessnen ijjen macca d aweḍḍar!
– Maca a baba ameqqran …. aqqa lxuḍret-a ddren !
– Iwa min dam-yettɣil, qa ddren hi ma lla. Neccin ixess-aneɣ a ten-nettssu, ad dag-sen netthella ḥuma ad leqḥen mliḥ. I das-yenna s uzmummeg.
Umi yugur baba-s ameqqran, tufa Nunja ixef-nnes weḥḥed-s di tqiraḍt n lxuḍret.
– Baba ameqqran yexḍar ɛawed tlata n teṭumaṭicin nhar-a ɛawed. Maca tiwecca ad yili d turni-inu. D aya i yenna lxess.
– Hiih zixenta, itteɛjib-awem lḥal xmi kenniw nttett! I tenna Nunja s utebheḍ.
– Ɛad lux, minzi xmi ca n ijjen ittas-d ḥuma ad yeksi tiquqay-nneɣ, ittettu-aneɣ ar ɣa nazeɣ. Maca baba-m ameqqran, isɣa-aneɣ, iẓẓu-aneɣ, d netta i daneɣ-yejjin mliḥ di tqiraḍt-a, luxa nujed ḥuma ad aneɣ-issnen. D aya i yenna lebsel azegza.
– Aqqa issluf-ayi, itthilla dag-i, tiwecca akid-s raḥeɣ ay imeddukal. I tenna ijjen txizzut d tameẓẓyant.
– Hayhay, cem ɛad d tazegzawt, wer tessenḍyed! Nec ttwaliɣ iggur ad yexḍar tacalact (lefjel). I d yenna lebsel azegza.
Tekmummec Nunja x iḍaren-nnes d nettat txezzer tinifin-nnes-nnes i teẓẓu, ijjen ufitu i d-ileqḥen zeg ucal:
– Hae, tleqḥed! I d-tenna Nunja.
– Psst! Ades-d ɣer-i, wec-ayi awal-nnem ila ad ayi-tetthellid. Iggur ad dewleɣ d tinifin tameqqrant di jjihet-a amen tekmel. I das-tenna tinifin-nni.
– Safi, wciɣ-am awal.
Deg umensi, yessujed baba-s ameqqran ca n lxuḍret ccurent s ibiṭaminen. Yewca-as ijjen uḥibbi d ameqqran i Nunja.
Taxsayt-nni ila teqqim tettɣennej: “ay lalla ya ral, ay lalla buya, nhar-a d sseɛd-inu…”
Icten zi lleft i ttuɣa yellan di tebḥirt, tenna-asen: “ita xzer i tqebbuzt-in diha am yin cḥal i das-iɛjeb ixef-nnes.” Rrin-d x-as : “wah, qa iɛejb-as ixef-nnes, maca ula d cem sbar a lleft!”.
Tiwecca-nnes, zegga isqaqa uyaẓiḍ, akked tuffut, traḥ Nunja tettazzel ɣer tebḥirt.
– Waaw, deɣya telqeḥ-d. Azuul i kenniw. Iwa a tinifin, mamec tellid nhar-a? Teffuded ma?
– Wah, ffudeɣ cwayt, maca lux yuẓa ɣer-i lḥal zeg wami ugurent tixizzutin, tzemmred ad teẓẓud ca n imeddukal d jjdid ṭṭerf-inu.
Temmel-as Nunja aṭṭas n tquqay n lxuḍret, ha wen n baṭaṭa, ha wen n tfelfelt.
– Xseɣ tifelfelt, i das-tenna tinifin.
Ussan ɛeddan d Nunja teqqar aked yiman-nnes ila ɣer-s sseɛd. Ɣer umeggaru, teffeɣ-as taqiraḍt-nni ḥsen zi playa. Tinifin meɣrent-id, uca iɛejb-as lḥal aṭṭas i Nunja.
– Safi a Nunja, xzar, luxa tinifin-inu ssenḍyent.
– Ayyaw ya cḥal tecnid! Baba ameqqran inna-ayi a negg ca n ṭṭajin n tnifin nhar-a.
Traḥ Nunja ad telqeḍ merra tinifin-nni. Uca tuzzel ɣer baba-s ameqqran ɣer kuzina, tenna-as:
– Baba ameqqran! Xzar min dayi-yewcint tinifin.
– Ayyuz a Nunja, manaya yecna aṭṭas. Lɣillet-a nnem tessbeḥ qbala. Ittban ila manaya teẓẓu-tt s waṭṭas n tmexsa. Iggur ad am-ssujdeɣ ijjen lxir n ṭṭajin. Nunja, awern-as, tɣebba tinifin n ṭṭajin