Lwalid Mimun : Amedyaz n ddcar isfurrujen*

* Amagrad-a cerceɣ zzay-s deg wedlis n Muḥemmed Inɛisa, Lwalid mimun, zi ddcar ɣar umaḍal, pp. 30-33

Wer ssineɣ minzi ɣa ssetiɣ ula mamec ɣa ssentiɣ tira x yijj umedyaz[1] d ameqqran s lmusiqa-nnes d tqessisin-nnes, d marra min iwca i tmaziɣt deg yijj n wakud ttuɣa awal xaf-s d ṭṭabu, awal xaf-s issadaf ɣer texjunt… Lwalid Mimun ismun jar tarezzut di txabit n tmaziɣt, tira n tqessisin ula d tinfas tiquḍaḍin, d tarezzut xef llɣa d-ɣa-yasen aked iɣennijen-nnes. Manaya idrus ɣer yewdan nniḍen ittɣennajen. Ammu, nezmer ad nini belli Lwalid d anaẓur s tidet, tamaziɣt tettazel-as deg idammen, maci ɣar issawal-itt niɣ ittɣennaj zay-s waha.

Lwalid Mimun niɣ “Bob Dylan” n Arif amec t-ttsemman lebɛaḍ, ssneɣ-t zegg^wami ɣar-i setta n iseggusa. Ttuɣa ɣar-neɣ tasfift tamezwarut Ajjaj. ‘‘Ddcar-inu’’ d wenni d aɣennij amaziɣ amezwar i selleɣ, iqqim lebda iɣza di twangimt-inu. Ajjaj d taɣuyyit n Lwalid Mimun, minzi imken wer yufi iwdan d as-ɣa-islen di tidet, uca ittetter zeg wajjaj ad yirar[2] s yiles-nnes, ḥuma ad as-tsell marra ddunit. Aɣennij-a am yenniḍen ksin aṭṭas n lemɛani d aneɣ-ittejjan ad neḍleq i yeswingimen wer ittenfiriren :

Tanewwact teqḍu, ɛejnen x-as,

Tqubuḥt wer tesḍew, ḥewwsen-as

Min ɣar-s d asḍew.

Min ixes ad yini s tnewwact ? Wi tti-iqeḍwen ? Mayemmi tqubeḥt wer tesḍew ? Wi d as-iḥewwsen asḍawen ? Deg uɣennij-a day-s iwalen nniḍen hewnen, ttwassnen ɣer marra yewdan, maca amedyaz iwca-asen lemɛani nniḍen ḥuma ad yini mamec nniḍen belli Imaziɣen ɛemmars ad ttwasefḍen zi tmurt-a, ad qqimen d taɣennant i iḥewwasen.[3]

Ruḥen ussan usin-d, rami d-teffeɣ tesfift wis tnayen “Ametluɛ”, mazal ɛeqleɣ wami tt-it-yiwi baba ɣer taddart deg usegg^was n 1987. Iɣennijen-nni ula d nitni ttuɣa tteɛjiben-aneɣ, nettaf day-sen ixfawen-nneɣ. Tifraz n tnuyam di ddcar ‘‘aqbuc x weɛrur, truḥ ad tayem’’, tifraz n Arif s llɣa icnan ismunen jar tiyita n wallun d usexdem n giṭara, larmunika… manaya ijja tasfift-a wer terwis min tt-izwaren. Zeg iɣennijen-nnes dayi ittiɛjiben aṭṭas neccin ssa :

Abrid waxxa iẓẓu, iẓẓu s lḥarrac

A neggur, a neggur, ar ɣa-naf nnewwac.

Ttuɣa wer ssineɣ umi qqaren lḥarrac, wami ɣa seqsiɣ di ddcar, sseknen-ayi mamec iga, d ijj n ddeg n arbiɛ day-s asennan. Asegg^was-nni iɣmiy s waṭṭas deg yigran n Tejdect.[4] ‘‘Neccin ssa’’ wer iqqim ɣar di Arif, iḍwa ura ɣer imucan nniḍen am Leqbayel, Tafilalt, Sus. Aṭṭas n tawmat ssenni ɣar ad ssnen necc d Arifi ttidaren-ayi aɣennij-a. Dinni ula ca n iḥudriyen wami ssentan almad n giṭara, ttuɣa itteɛjib-asen ad t-iraren, lemden zzay-s ula tamaziɣt n Arif.

Lwalid Mimun ittagem-d zi tala n tmaziɣt, zeg yiwalen n zic, uca ittic-as tifras nniḍen. Mara wer terrid taynit mliḥ, imken wer t-ttifhimed min ixes ad yini, ad ak-ittɣil d awal waha ; amm uɣennij “Bu ydunan”, arbiɛ nettaf-it deg yegran, amen d ayi-tɛawed ḥenna, ttuɣa ssawlen akid-s qqaren-as : « Bu ydunan, a bu ydunan, la baba-c, la yemma-c, la wi d-ɣa-ikken awaren-ac », ɣir ad isell i wawal-a ittxeyyaq am bnadem, itteqwis uca iweṭṭa-as wafar. Deg uɣennij-a, Bu ydunan d azamul[5] n Umaziɣ umi ttwakksent tseqqar, idwel d lberrani di tmurt-nnes, xsen ad t-qelɛen zeg yiẓuran ḥuma ad ittu ixef-nnes min iɛna d manis d-ikka.[6]

Di mkul tasfift, Lwalid Mimun ittawi-d aswingem d llɣa d amaynu. Mala neksi Ddhar ubarran (1999), nezmer ad nini belli tasfift-a d awardi i yenni iwardan buḥber-nnsen i tlelli. Taqessist-a ineqcen di twangimt n yirifiyen d trifiyin, zi zic ar yiḍa, i ttuɣa nettaf-it x yilsawen n imedyazen, iwca-as Lwalid ijj n wudem nniḍen s llɣa d as-igga. Zeg iɣennijen icnan Rbaz atwargi. Xmi d as-ttesriɣ, ttafeɣ ixef-inu ṭṭaweɣ di tniri[7], iwalen yullɣen d ayi-ittawyen ad swinegmeɣ di min ixes ad yini. Aɣennij-a isskan ula tawmat jar Irifiyen d Imuhaɣ, d taɣuyyit n tlelli i Imaziɣen mani ma llan :

Lbaz atwargi wer da tezyem tiṭṭawin,

Ittwala Tamazɣa d tilelli n wulawen.

Lbaz yexs ad yini Amaziɣ n tidet, wenni wer iɣeṭṭren zeg yiles-nnes, d Amaziɣ s yiri-nnes d azegrar. Aṭṭas n iɣennijen n umedyaz issawal day-sen s yiles n jjmaɛt, isawal s neccin, maci s necc. D iseqsan niɣ tibratin i yenni issuguran tamurt-a, i yenni iccin tiseqqar n yimezdaɣ, ukren-asen ula d igerwan-nneɣ waxxa ‘’neccin’’ wer d asen-neggi ɣar lxir :

Nejji-kenniw tenɣim-aneɣ,

Neksi-kenniw tenḍarem-aneɣ,

Neẓẓu-kenniw temjarem-aneɣ.

Waxxa aṭṭas n twalatin nettaca s uxeyyeq deg iɣennijen n Lwalid Mimun, maca deg uneggar nettaf asitem. Amedyaz wer iqeṭṭeɛ layas i yijj n yimal icnan, ‘‘tafuct-nneɣ ad d-taley’’ amec iqqar. Ssitimeɣ s tidet tafuct-nneɣ ad d-tali, Imaziɣen ad kkren ad bedden x iḍaren-nnsen, ad ilin d lebyuz waği d ifiğusen, amec issitim umedyaz n ddcar, amedyaz n Tmazɣa, amedyaz n umaḍal.

Tira: Ɛebdlmuṭṭalib Zizawi

[1]  Amedyaz ikk-d zeg weẓwar “dyz” ixsen ad yini “ɣennej”. Awal-a nettaf-it di tmaziɣt n Arif ula n imucan nniḍen. Manaya immal belli awal amaziɣ d ijjen zi Siwa ar Kanri, maca lebɛaḍ n yewdan wcin ijjen lmeɛna wer icni i umedyaz.

« deyyez “parler à tort et à travers ; parler en mal des autres ; parler bien.” Amedyaz “chanteur, compositeur, aède, barde, troubadour, poète public, musician”.» Kamal Naït Zerrad, Dictionnaire des racines berbères : (formes attestées), Vol. 2, Paris-Louvain : Peeters Publishers, 1999, p. 462.   

[2] Iɣennej

^[3] Neccin d rejruf iya ma ad tneqcem,

  Neccin d ruruf iya ma ad treqḍem.

[4]  Isem n ddcar-inu

[5] Symbole.

[6] Mustapha El-Adak, « Oralité et amplification rhétorico-discursive dans la poésie de Mimoun El-Walid : cas de Bu-ydunan », Actes du 2^e colloque international La langue amazighe, de la tradition orale au champ de la production écrite, (parcours et défis), Mohand Djellaoui (Dir), Université Akli Mohand Oulhadj, Bouira, pp : 149-160. 

[7] ṣṣeḥra.