Ayenni i iweḍ upulis n Barciluna irezzu wemɣar anebḍay n Kataluniya, Carles Puigdemont, i d-idewlen s ict tdewla d tadramit ɣer Spaniya awerni sebɛa n iseggusa i yesseɛda d aḍlib. Ipulisen n Kataluniya niɣ innu umi qqaren “Les Mossos d’Esquadra”
Ssersen imeqsaren deg webrid ɣer daxel d berra i Barceluna manaya maḥend ad afen Mass. Puigdemont, i yeẓrin yugur zeg ijjen wegraw ssbeḥ-a n lexmis.
Yiɛic ijjen wezgen d ameqqran zi tudert-nnes di Bruxelles. Zegga i t-iḍfer upulis x uqelleb n uzarug n Kataluniya aseggʷas n 2017.
Deg wakud-nni, imeqqranen n Kaṭaluniya, zzag-sen Mass Puigdemont, xedmen-d ijjen wefran-iman – tḥesb-it lmeḥkama tadusturit taspanyut – wer yebni bu x ṣṣeḥ. Zi senni nnan-d belli Kataluniya d tamurt i yiman-nnes. Uca awern-as tus-d Madrid maḥend ad tessers fus-nnes nican x tmurt-a zegga yerwel mass Puigdemont ɣer Biljik.
Ssbeḥ n lexmis-a, mass Puigdemont, yessiwel ɣer weṭṭas n inni i kid-s illan deg uberlaman Akaṭalan. Yenna “Maḥend ad awen-nini ila neccin lebda aqa-aneɣ da” yerni-d “twaggit n ijjen ufran-iman ɛemmer-s ad yili d abekkiḍ”.
Zi senni iweḍḍer mass Puigdemont.
Nnan-d aṭṭas zzag-sen belli qa izmer ad d-iban ɣer daxel i uberlaman deg wakud n werẓam ɣer tseɛɛet n 10h00 (08h00 GMT), maca wer din t-ttuɣi ca.
Ttwaggen imeqsaren deg yebriden di temdint amen tekmel, i d-yenna wemssiwel s yisem n tzuni n tewzirt n daxel takaṭalunit deg ijjen usiweḍ-nnes.
Temmel-d ttelfaza taspayut ɛawed ca n ifuṭuren zi La Jonquera, ijjen tegrawt i yellan x yegmiren n Fransa, mani nzemmer a nẓer apulis isbedda ṭṭumubinat ttfitcaren min day-sen.
Aleix Sarri, i yellan d ijjen i yeggin taḍa akked Puigdemont, yehwa-d x min ggin ipulisen amenni x X : “aṭṭas n ipulisen unuḍen i Barceluna ḥuma ad sbedden arrayes Puigdemont. Ddegg-a n tgemra s ttmenyat n yewdan maḥend ad asen-iɛjeb lḥal di Madrid. Maci d manaya i yetteggen tadimukraṭit”.
Amek nnan aṭṭas n wumlayen, sxedmen ipulisen gaz n lfelfel maḥend ad terrcen inni illan aked Puigdemint i ttuɣa yenjemɛen zzat i uberlaman.
Ijjen ameknaw Ignacio Garriga, zeg umulli n Vox afusi, i yettagin x tesimant n Kaṭaluniya, yenna belli Vox: “ad tegg merra min x-as maḥend ad yettwaṭṭef Puigdemont”.
Ca n ispunya qqaren belli nitni ttbehḍen mamec apulis wer iwwiḍ ca ad yeṭṭef Puigdemint waxxa ttuɣa netta yenna belli yeggur ad yedwel ɣer Kataluniya di simana-ya.
Larbeɛ i yeɛdan, yenna deg ijjen uvidyu x X belli “yebda ad yedwel zi tuḍlibt-nnes” yerna yenna belli uḍuf-nnes wer ittili ca d azefan.
Ittban-d din aṭṭas n min iɛernen Carles Puigdemont maḥend ad yedwel ɣer Spaniya.
D amezwaru, ixes ad iɛebbeẓ x lmexzen Aspanyu maḥend ad yekkes aḍfar-nnes i das-ggin i netta.
Mamec ixes ad isbedd ficta i zi ɣa ggen Salvador Illa d arrayes n Kataluniya ass-a.