Miḍar (TIFRAY) – ccetkan imezdaɣ n Miḍar Alṭu zeg usinef i yettwaggen x uraqq-a, aya deg ict tebrat tennurẓem tesqad-itt tmemsunt n Miḍar Alṭu i tgumi deg Wuruppa.
Yus-d di tebrat-a, i tessek tmesmunt-a i lɛamala n Ddriwec, ila “Miḍar Alṭu ɛarrnen-t cway cway ɣer usinef”, amen wekkden ila waxxa ttwabnant ca n tmersal, maca wer ɣer-sent ileḥḥegg ula d ijjen ad deg-sent yexdem.
Amek i tessreɣ tmesmunt tfawt x waddad n waman i yella ɛad wer ten-ssiwḍen i ledcur, mani imezdaɣ ttsufran s fad, amenni ula ibriden i wer ittwaggen jer Iɣarben-Iferni, niɣ jer Tafersit-Timedɣert, i yettwaḥsab d ibriden zemmren ad snhezzen “tadinamit tademsant” n Miḍar Alṭu, amek yenna usiweḍ n tmesmunt.
Senni, twekked tamesmunt, ila wami din ijjen lazaɣ d ademsan, yejja iḥudriyen ad fekkren mɣir deg wetlaɛ, mani yedwel umeggaru-ya d “ict testratijit n tudert ɣer waṭṭas n imezdaɣ”.
Amek yettwassen, ttuɣa teẓra Miḍar Alṭu d jjwayeh-nnes, aṭṭas n inhezziten maḥend ad zzerzen taɛejjajt n usinef x ledcur-nnsen, maca manaya wer ibeddel walu di lḥal n wemkan-a.