Jahennama teccur, waxxa amenni ɛad iwdan ggin fila ad adfen. Xsen ad adfen s minzimma. Lami bdan ad mseḥsaren, uca a dd-yeffeɣ cciṭan simant-nnes, maḥend a x-asen yazzel.
Yenna-sen: wer ɣer-i da bu wemkan. Kulci yeccur. Yeqqim ij n wemkan waha ittedden yetzalla. Amcan-nni, wer t-ittiwi mɣir wenni t-yetahellen, wenni i tent-yeggin d timeqqranin qaɛ deg-wem.
– “Da ca ḥedd zeg-wem yenɣa?”
La d ijj wer dd-yerri
Uca yebda yeggur yettseqsa-ten x min ggin qaɛ zi lefɛayer tiɛeffanin. Maca marra min das-ɛawden, wer ten-yessiweḍ maḥend ad stahellen amkan aneggaru di jahennama. Yessekka tiṭṭawin deg useddi-nni i ggin, al mani yeẓra ijjen ttuɣa ɛad wer t-isseqsi.
– cek min da tettegged? Min txedmed a win da ibedden yeṭṭurfi weḥḥḍes? Qaɛ wer tennid walu. Qaɛ wer tenni cek min teggid?
– necc? Walu! Necc ttuɣa-yi d ij n bnadem d asebḥan, buqareɣ da deg webrid waha, ittɣil-ayi iwdan-a bedden ad sɣen ddexxan.
– maca labud ad yili teggid ca n txeddimin d tiɛffanin! marra iwdan ggin, mkul ijj yegga lḥeqq nnes!
Bnadem nni asebḥan yenna-s: “Wah nican, ẓriɣ-ten marra, maca necc aggʷjeɣ x-asen, ssedḥiɣ uca aggʷjeɣ. Ẓriɣ iwdan ttazlen x yewdan, maca necc ɛemmers ma udfeɣ jer-asen. Ẓriɣ-ten slaẓen iḥenjiren imeẓẓyanen, zzenzen iwdan d isemɣan. Refse x yenni iḍeɛfen. Sd cceɣ mummu-inu ila marra manaya ẓriɣ-t. Marra wi ttuɣa dayi dd-yennḍen, yegga lḥeqq-nnes. Illa necc weḥḥdi beddeɣ am upilar, wer ggiɣ walu!
Yenna-s cciṭan s uṭebhet: walu qaɛ? Mtebbet belli teẓrid manaya marra?
– wah, ɣer tewwart n taddart-inu ɛad!” yenna-s bnadem asebḥan
– wer teggid walu qaɛ?
– wer ggiɣ walu, Aḥeqq cciṭan ma ggiɣ ca n ḥajet!
– iwa adef-dd ammi-inu adef-dd. Qa Amcan anegga, d ccek umi dd-yusa.
Ɣer uneggar, cciṭani yelḥem yegga-as abrid i “bnadem asebḥan” maḥend wer t-ittḥidi xmi ɣa adef, wer t-ileqqef!
n Pedro Calderon (1600–1681) – yerra-tt-idd ɣer Trifit: Majid Akalai