Zegga i iɛewwel Vladimir Poutine rrayes n Rusiya bac ad adfen deg ucal n Ukraniya. Rrayes n tmurt-a issiwel ɣer wi illan-nnes x webrid n Facebook bac wer ttiggʷden zi walu.
Rrayes n Ukraniya, ilaɣa-d di lexmis-a inamuren-nnes, bac wer ttiggʷden zzat i tiyyita n Irusiyen.
“Wer tteggʷdem zi walu, aqqa-aneɣ da nujed i kulci, iggur a nerbeḥ”. D aya i yenna Zelensky deg ijjen tebrat s ubidyu x Facebook, irni inna belli qa Rusiya tegga ca n teyyita x ca n lebni n iɛeskriyen.
Iḍuqqizen mmeslen
ɣer lefjer n lexmis-a, rrayes n Rusya Vladimir Poutine ilaɣa bac ad tili ijjen temhelt (opération) d taɛeskrit kunṭra i Ukraniya, yenna ila ixes ad as-ikkes lesnaḥ. Iḍuqqizen ila mmeslen deg ukapital Tukranit Kiev, ɛawed deg waṭṭas n tneddam n tmurt, am Kharkiv, Dnipro d Odessa.
Tamhelt-a Tarusit ixeddmen deg waṭṭas n tneddam Tukraniyin tus-d bac “ad terdel ddewla n Ukraniya, ad ḥewwsen tamurt-nnes s bezzez ad ssidfen ijjen usistim n uḥewwes”, d aya yenna yenna awzir n Ukraniya n tmeslayin tiberraniyin.
“Ixess tamunit d taqsuḥi bac ad nesbedd ttaɛeddu n Vladimir Poutine x Ukraniya”.
Lɛesker n Rusiya yenna belli netta yewta ca n iraqqen d iɛeskriyen n Ukraniya, awerni ca n tseɛɛatin umi yenna Vladimir Poutine ila iggur ad bedden aked inni ixsen ad bḍan tamurt n Ukraniya.
Di llilet n larbeɛ i d ɣa yuffun d lexmis, iɛda-d Poutine x tlibizyu, inna ila igga ad iwwet Ukraniya bac ad isbedd ttaɛeddu-nnes di ccerq n tmurt.