Di min yeɛdan n wussan, ttuɣa kksen awal ifellaḥen n Teẓḍuḍin, Bni Wkil, Ulad Mḥend, Buɛareg, Ulad Settut d Uzayyu maḥend ad ggen ijjen ubeddi zzat i tmenbaḍt n Nnaḍur.
Abeddi-ya i yeggin ifellaḥen maci d amezwaru, maca ila yezwar-asen ggin ijjen nniḍen zzat i tegrawt n Bni Wkil Ulad Mḥend di jjwayeh n Uɛerwi, zegga i x-asen qeḍɛen aman n tessawt x tmura-nnsen d tqiraḍin-nnsen n tfellaḥt, manaya issexsar-asen ca n 1500 hiktar zi taẓẓutin.
Ttettren ifellaḥen ad bḍan aman n tsessawt, ad asen-ḍelqen, ad tadef tawzirt n tfellaḥt deg ijjen wemɛawan, ula kter ad ten-ɛawnen s ttmenyat zegga i yewta lazaɣ merra min ẓẓun.
Aked uɣezdis-nniḍen, ccetkan Irifiyen-a s liɣla n dduzan n tfellaḥt, manaya irenni x-asen ddqel n usarref, isrusa-ten zzat i ca n imxumbal n ikunumiyen n tidett, ca zzag-sen tthuddan x-asen s leḥbes wami i yeggin aṭṭas n imerwusa.
Maca min iwqɛen awern-as!
Maca lmexzen n Nnaḍur yugi ad iwwec ttesriḥ i ubeddi-nni d tecli-nni i ttuɣa xsen ad ggen ifellaḥen n Kert d Sebra.
Ttuɣa ifellaḥen xsen ad ggen ijjen tecli s ttrakturat d imassen n tfellaḥt zi tegrawt n Bni Wkil Ulad Mḥend ɣer uraq n temnbaḍt n Nnaḍur, maḥend ad sɣaten ɣer lɛamil, ad asen-yaf ifessayen.
Ar danita, ɛad wer yessin ḥedd min zemmren ad ggen ifellaḥen Irifiyen i yeccin aɛmud zi tzawa d ubeddel n uklima zegga i yettwattun zɣer ddewla tameɣrabit.