Le Rifain
Tewca-sen terfiqt n Bayern München i imeddukal n Messi minxef rezzun, awarn i umi i ten teddez aɛecci n wass n jjemɛa 14 zi ɣuct, deg yijjen tfust n čamma n uḍar s tmenya n iɣulen ɣer tnayen. Tfust-a n čamma i ttuɣa yellan d rrbeɛ n uneggar n Champions League, wer ttuɣa ittriji ula d ijjen a deg-s tewḍa terfiqt n Barcelona x uɣembub, s cckel-nni i zi tettwarna aked terfiqt talimant i wer ireḥḥmen.
Thomas Müller yegga tnayen n iɣulen, ijjen di ddqiqet 4, ijjen di ddqiqet 34. Iɣulen nneɣni usin-dd ammu: Akerwat Ivan Perišić (21), Serge Gnabry (30), Joshua Kimmich (63), Apulandi Robert Lewandowski (84), Abrazili Philippe Coutinho (85 d 89). Iɣulen n Barcelona; ijjen yessidef-it David Alaba s ufayu di tracca-nsen (7). Wenneɣni yegga-t Luis Suarez (57).
Bayern ad yemsagar deg wezgen n uneggar ass n larbeɛ i dd-yegguren, aked terfiqt i ɣa yernan di tfuset i ɣa yettwaggen jer Manchester City d Olympique lyonnais.
Ɣezzu-ya i tegga Bayern di Barça, yesfekkara-neɣ-dd s ɣezzu i tegga terfiqt n Uliman di Brazil s sebɛa n iɣulen ɣer yijjen aseggʷas n 2014. Manaya, yeshekkʷa tandut n Bayern i di lmizan n terfiqin i yettemɛutrusen ḥuma ad rnant deg uneggar, ad ksint awardi n Champions League.