18.1 C
Nador
Larbeɛ 22 Mayyu 2024

Asijji x wedlis: “Abrid ɣer yezlan” n umari: Muḥemmed CACA

Halim El Madani

1. Asijji x wedlis Abrid ɣer- yezlan

Abrid ɣer yezlan d adlis n “Muḥemmed CACA” i yura s tmaziɣt deg yiger n wezɣan (akritik), d adlis amezwaru i yuran s tmaziɣt deg yiger-a. Ar ass-a, nrenni-dd ɣer-s kkuẓ (rebɛa) n yedlisen-nneɣni i yuran s tmaziɣt, i wer yellin ca d asneflul, udfen deg yiger n wezɣan niɣ n tɣuriwin, netteffeɣ di kkuẓ n yedlisen:

  • Abrid ɣer yezlan ( M. CACA )
  • Irifiyen ass-a ( Chahid. ANDIC )
  • Lwalid Mimun zi dcar ɣer umadal ( M. INƐISA )
  • Tajerrumt n Tmaziɣt Tarifit ( Jawad. ZZUBEƐ )
  • Tiɣri deg wedlis zi lallaɣ n tmurt ɣer- luɛla n ujenna (Yusef.

QURAYC)

Iffeɣ-dd wedlis-a deg useggʷas n 2000, ittwasiggez di tẓerẓagt “IẒEWRAN”. Adlis-a yusa d s weklu d aḥmaymi am marra idlisen-nnes yura s tmaziɣt, Sennej i wedlis nettaf din isem n umari “CHACHA” deg wammas n wedlis nettaf isem n wedlis Abrid ɣeryezlan, s wadday dinni isem n tmesmunt “IẒEWRAN” deg-s 255 n tseniwin, yura s usekkil alatin, s yiles-nnes n cebdan, s iluganen deg wansa-nsen. Tutlayt i zi yura tehwen bezzaf, tisseffaw, minzi yura am mamec nessawal, isseqdec deg-s Aṭṭas n wawalen n teɛrabt: lmujtamaɛ, cciɛer, lmerḥala, lmawaqif, lmeɛna, lɛaṭifa… 

Maca manaya war nzemmar ad aneɣ-yejj a nini aqqa CACA war yuri s Tmaziɣt. Adlis deg-s asefsi n yezlan n zic, s lxezrat n umari, wer nettif ca ittcel x imsedwalen d imassanen niɣ nzemmar a nini aqqa yettcel x imsedwal yellan d izlan . Ammu i yebḍa umari adlis-a:

  • Awal amezwaru
    • Izlan n lḥubb
    • Izlan isxerwaḍen
    • Beṭṭu wa yeḍbiɛen
    • Kuntra i cckimet
    • Leɣrubiyyet
    • Tanaɣit
    • Tḥajit n mali wahya mali

2. Min yeɛna Muḥemmed CACA?

Ilul deg wass n 15 zi tɣuct 1955 di teqbilt n Ikebdanen, di Qabuyawa. Immut deg wass n 29 yunyu 2016 deg Wamesterdam. Netta d amari, d azlawi, d anaẓur, igga tizemmar-nnes s tmaziɣt. zeg wami issers aḍar-nnes di tmurt n Hulanda, yessenta ad yari.

  • Zeg yedlisen yura s Teɛrabt:
    • Lmeɣrib ljadid, tiqessisin, 1979
    • Qasaid lfuqaraa, tiqessisin 1985
    • Ayna Al amal, tiqessisin, 1998
    • Kalimat mutamarrida, tiqessisin, 1999
  • Zeg yedlisen yura s Tmaziɣt:
    • Laẓ, tuɛɛaryent, d tarewla zeg yiṭan, tiqessisin, 1995
    • Reẓ ṭṭabu ad d teffeɣ tfukt, ungal, 1997
    • Ajḍiḍ umi yettwagg celwaw, tinfas, 1998
    • Cway zi tubbuhelya ɛad war tiwiḍ, tinfas, 1999
    • Abrid ɣer yezlan, tɣuri x yezlan, 2000
  • Tuff teqqen, ungal, 2015
    • tarwa n umaḍal, tiqessisin, 2015
    • Araji, tiqessisin, 2015
    • Tayri n tayri, ungal, 2015
    • Hdem bna, ungal, war ittwafsar

3. Agensu n wedlis Abrid ɣer yezlan

Issenta umari adlis-nnes s uwenni ya:

Ur yelli mayen iweɛren anict lexmi ɣa yekker bnadem ad issiwel xef yezlan, melmi ɣa nini wu d izli, wu wer yelli ca d izli, wu d cciɛer, wu wer ɣer-s akides bu lɛalaqa”

S uwenni ya, iwca umari ijj n wazal d ameqqran i yezlan d usefru.

3.1    Izlan zzat i 70 d awarn as

Ibḍa izlan ɣer sin n tferkiwin; taferkiwt n zzat i iseggʷusa n 70, d tfekriwt awarni iseggʷusa n 70.

Issers-d umari ijj n useqsi, issawal x umedyaz di tferkiwt n zzat i 70, ma tuɣa yessen min ittegg? Di tferkiwt-a itteqqen ɣer-s izli, rid am taferkiwt n 70 d awarn-as iqqen ɣer-s taqessist. Yeqqar aqqa min dd-yusin deg wakud-a immeksi-dd zi berra, yarni-dd deg uɣezdis-a illa taqessist n uɣennej ttuɣa wer telli qeɛ di Arif, amen yura x tqessisit, illa d ijj n wawal ttuɣa wer t-qqaren imedyazen. Ismedya s tqessisin “ddhar n ubarran” d tqessist “mali wahya mali” yidar d illa tuɣa qqaren-asent tiḥuja.

Asefru zzat i 70, iqqar kulci min illan, war yeccit leḥsab ula i yijj, mamec mma yexs ad yili waxxa ɣa yettwaḥerrem. Asefru awarni i 70, iccat leḥsab i min ɣa yinin yewdan,zzat ttuɣa-t d tareẓẓit n ṭṭabu.

Iwca asissen i yezli d Lqasida:

  • Izli d ajenna, yetticc-ak tilelli d ubuḥbel n uxarres, yesmeɣɣer- ak laggʷaj,yettejja-cek a deg-s txarrsed mamec texsed.
    • Lqasida tabridt-nnes weḥḥdes, tettemsebḍa la di tira, la di laggʷaj n wawal.

3.2 Cḥal ɣer-neɣ nettaf n Buyat?

  • Izli ameẓẓyan deg-s kkuẓ n tunṭiqin

Ah ya ralla ah yar-
a Ah ya ralla buya

-Izli awesḍi deg-s jar xemsa d setta n tunṭiqin

Ah ya ralla buya.
Ah ya ralla ah yar-
a Ah ya ralla ah 
buya Ah ya ralla ah 
buya Ah ya ralla ah 
yara Ah ya ralla
Ah ya ralla buya.

Izli ameqqran deg-s jar sebɛa d tmenya n tunṭiqin, ad yili ujar.

Ah ya ralla ah ya ra Ralla ynu
Ah ya ralla ah buya Ralla ynu
Ah ya ralla ah yar-a Ralla ynu
Ah ya ralla ah buya
Ralla ynu

Yura x kraḍ-a n wanawen, belli wer zeg-sen yeqqim mɣer- wanaw amezwar.

3.3 Abeṭṭu jar lḥubb d arriḍa

Nettɣil aqqa lḥubb d arriḍa d ijj, ɣir lḥubb s teɛrabt, arriḍa s tmaziɣt. Netta uhu, mkul ijj weḥḥdes. Iwca-dd anemmal x manaya s yezlan iqdimen i dd-isbanen mant abeṭṭu i dinni jar asen:

 Lḥubb:
Ittili tnayen xsen ayawya, ssnen mani gguren, safi msefhamen, maci ɣir d ccenɛet, yerni-dd illa muḥal ma ɣer-s isem s tmaziɣt.

Arriḍa:
Ittili ɛad d timexsa zi laggʷaj waha, wer dinni walu, amen wer deg-s tettili bu tidet, d aseɛdu n wakud, ittexs ad yini ca wer ittif tizemmar.

Abeṭṭu ya iwca-dd anemmal xafss s yezlan:

(1)

Lɛadaw a lejwad, 
Faḍis yuru tini.
Ɛemmars lḥubb
D arriḍa war yemmelqi.

(2)

Tiṭṭawin nnem
daysent lwarata, 
ijjt tettru x lḥubb,
ijjt tettru x rriḍa.

(3)

Llah yenɛel lḥubb
d rriḍa n ujemmaḍ-in,
 Manis mma yekka 
sseḍfareɣ as tiṭṭawin.

(4)

Wwet ay anẓar wwet 
ḥima ad iɛemmer ljubb, 
ḥima ad telqeḥ rriḍa 
Ad yenjeḥ lḥubb.

  • Ibḍa jer tqessist n leɣnuj d tqessist n tira
  • Yura x uliman i ɣer-neɣ nettaf aṭṭas deg yezlan n zik, nettaf yesmun-iten Ḥasan BENƐQIYYA deg wedlis-nnes “La distique de la poésie Rifaine”. CACA belli Aliman-nni yellan deg yezlan, war t-qqaren ca ɣir i tmurt n Uliman, qqaren-t i tmura nneḍni n uruppa.

3.4 Afsay n yezlan

Afsay i yegga i yezlan, maci d ijj n wefsay d anezɣan; wer nettif bu yura x talɣiwin-nsen, amecnaw: tameɣruḍt mamec dd-temrusa, ma temrusa-dd? lmizan deg-sen, ma nLalla Buya, ma d ca n lmizan nneɣni… niɣ x umawal, niɣ mamec yidar deg umezwar wa d izli ma war yelli d izli? Minzi ɣa izemmar ad yini wa d izli ma war yelli d izli, ad ixzer maad deg-s yaf deg yeg yezli tifraz nni i zi yettwassen, ssa i ttwaliɣ

nzemmar a nini ma d izli ma uhu? Ma nettaf deg-s ca n tewlafin timessefrutin (les figuresde style), ma d awal waha i qqaren marra yewdan. Nettaf amari CACA ikessi-dd izli issawal xaf-s s umata deg uɣezdis n usentel, awarn-as ikessi-dd zeg-s ixxamen, issawal x usentel-nsen mamec ittwala netta. Ittili d ijj n twinest, netta yarenni deg-s issiriw-itt, d ammu yegga i usefsi.

Timaynutin

Fser-itt