Tifray – Teḥkem ijjen lmeḥkama d tafransist, ass-a n ttlata i yeɛdan, x ijjen wergaz d mmis, ɛlaḥsab akerfes i yeggin x ca n imeɣrabiyen i d-yusin ad xedmen s kuntratu di tbeḥḥar n uḍil di Bourdeaux, yeffus n Fransa, i yettwaḥsab d amkan i yeẓrin “asebbeb s yewdan”.
Xenni, lmeḥkama n Libourne, di jjwayeh n Bourdeaux, teḥkem x wergaz-nni, bu 59 iseggusa, s useggʷas n leḥbes, ad yessers ijjen tmeqyast d taliktrunit, minzi tufa ila ‘ittsebbeb deg yewdan’ d ‘yebbeẓ ca n yewdan xeddmen ɣer-s deg ijjen tzeddiɣet wer ilaqen’.
Mani ḥekmen ula x mmi-s (28 iseggusa) s settchur n lḥebes, ad tt-yekk s tmeqyast talikṭrunit d tzeddiɣt n bezzez. Mamec gedlen x wergaz-nni d mmi-s ad adfen Fransa s 10 d 5 n iseggusa, s umseḍfar, mani i ɣa xellsen abrusi ɛawed.
Ina weyyen-d ca n setta n yewdan, zi Lmuɣrib, maḥend ad xedmen di ca n tbeḥḥar di Fransa, ila wcin-asen awal ḥuma ad asen-ggen tiwriqin, ad asen-wcen lxedmet s 1500 euro i cher, maca xellsen-asen ca n 12 alef euros.
Maca ijjen zzag-sen i ten-yedɛan, inna belli mmersen deg ijjen tzeddiɣt wer tliqq, mɛubbẓen dag-s tmenya n yewdan x ca n tassut twessex, d ca n twalatin ula x tmurt d udutci s waman isemmaḍen.
Maca iccetka ila ggin x-asen bezzez ad xedmen aṭṭas di tbeḥḥar n uḍil, s ijjen uzgenfi i wer yeɛdin arrbeɛ n tseɛɛet bla ma ad ten-xellsen x 18 n wussan n lxedmet.
Maca seg uɣezdis-nnes, inker ubuɣaw ddegg-a merra, itter ad snufslen argaz-nni d mmi-s, ameknaw tɣawsa-ya, din aṭṭas zzag-sent di Fransa, mani lmeḥkamat i yellan di Libourne d Bourdeaux ttrajan ad ad dag-sen wcen lḥukem-nnsen.