Issers ubaba Fransis, i yemmuten ass-a n letnayen x 88 iseggusa, tɣawsa n bnadem deg wul n tebrat-nnes, s uyenni i ttuɣa t-ttexsen aṭṭas n imumnen, waxxa aṭṭas n yewdan di teglizt ila wer kid-s llin di mayen ittegg amenni.
Ittwassen warjuntini-ya, i ttuɣa ittexsen tcamma n uḍar d tangu, s unhezzi-nnes ameqqran, maca waxxa amenni ila wer iggʷij ca aṭṭas x ufilu n ukritiki.
Waxxa netta, yenɛem s ixef-nnes, deg ijjen udlis d aqemqam i di yegga ca n yemsawalen aked ca n yewdan zeg umaḍal, ittwafser di 2022, yenna deg-s: “nec d imɛesseb, wer sebbreɣ (…) ca n twalatin ttqelliqeɣ”.
Illa ixes bu turjatin-a, i ineɛmen ila “ittsax xmi ittẓalla”, ḥuma ad yaweḍ ɣer uwettas-nnes ameqqran, bla ma ad yehtuta: ad yeɛdel ɛawed taglizt ḥma ad terr taynit i imeẓlaḍ d inni ittwassinfen.
Yenna zegga i t-stin deg useggʷas n 2013, ila netta yexḍar isem-nnes akehhan d asemɣer i Fransis d’Assise, i ttuɣa ittbeddan akked imeẓlaḍ d inni ittwassinfen., “xseɣ ict teglizt d tameẓluḍt i imeẓlaḍ”.
Fransis, ttuɣa-t d ababa amezwaru i d-iqqersen zeg wamarika talatint, zeg inni i ittekritikan aṭṭas talibiralit tamaynut, ila ittlaɣa ɣer tazreft tanamunt d tikulujit d ubeddi aked imetlaɛ i d-irewlen zeg imseksiten d ẓẓelḍ.
Yeqqar Roberto Regoli, aselmad di tesdawit tagrigurit tababawit di Ruma ila “Ababa issecrek taglizt di ca n tɣawsiwin ttuɣa-tent deg wul n tdimukraṭiyin n uɣelluy, am twennaḍt d uselmed d izerfan”.
Di Ruma, xezren ca n yewdan ɣer tebridt n Fransis umi ttuɣa itteɛjib ad yezdeɣ deg ijjen parṭma d tameẓẓyant, d usenwju-nnes i yewdan bla tazeddiɣt d imeḥbas ɣer ṭṭabla-nnes axmi d aɣewweɣ niɣ d tagrawla.
Ttuɣa ababa Fransis, yessawal-asen x teykatin-nnes xmi i ten-ileqqa.. Ula di Kuvid niɣ xmi i yettɣima di karrusa-nnes, ɛemmers wer yugi ad yessiɣ fus.
Ca n yewdan ttahmen-t ila netta “itthertef” zegga i yennurẓem x ca n yewdan ɛawden melken zegga llfen.
Aked uyenni, ttuɣa ttwalan ila min iqqar amenni axmi “ittmeyyek” x ihumusikswalen umi i ten-d-isnewju ɣer teglizt, amek “ibarek” lemlak-nnsen deg umeggaru n 2023.
Macca waxxa ttuɣa-t d aprugrisit deg uɣezdis anamun, maca wer yeffiɣ x ddsas n ddin amasiḥi.
Iwafeq x ijjen tmsektit n uvatikan i itteḥsaben “tahumusikswalit” d “abekkiḍ”, yenna-asen i ihumusikswalen ad raḥen ɣer upsikulug malla xsen ad dewlen d ikehhanen.
Am mamec yugi x weɣḍal n uɛeddis, yenna ila manaya axmi bnadem iraḥ ɣer ca n “ukriminal d aprufissyunil”, mamec i iɛawed iwekked ila twacunt [ixess] ad dag-s yili “ababat d tyemmat”.
Zeg uɣezdis agraɣlan, inna ila netta immexs tasebbabt n ssnaḥ d imenɣan, maca imesli-nnes wer das-isli ḥedd. Alaɣi-nnes i wafra deg Ukraniya iruḥ aked usemmiḍ, s uyenni i ten-d-iru d imeṭṭawen di Dujembir n 2022.
Mamec itter ad ibedd umenɣi di Ɣezza, iswiza ula aked inni iruḥen d tiherhert zeg imeddanen.
Inna “tettreɣ zeg inni ittemseksin ad sbedden aqerṭas, ad ḍelqen i inekraf, ad wcen twiza i wegdud i yelluẓen i yettexsen ɣer ijjen yimal n wafra”.
Di ccerq anammas, iban-d wergaz-a d ijjen n wemsawal jer tideyyanin.
Ilul Fransis di 1936 di Buenos Aires, netta d ayyaw n ca n iṭaliyen rewlen-d ɣer Arjuntin.
Izwar-as izzem imɣaren n Uruppa i yettagin x wetlaɛ.
X 36 n useggʷas, yedwel d amasay d anamur n iyasuɛiyen irjuntiniyen, aya ittwadenna x-as setta n iseggusa.