Amari: Mimun Lwalid Asuɣel: Sufyan Lhani
Mala taẓuri d afares animan axerras n kul tagrawt tanefgant, aqa Arif ɣur-s asneflul-ines g uẓawan d tedyazt d ccḍiḥ anamun d yiɣezdisen-nneḍḍen n tussna tanegdudt am yenzan d tunẓiẓin d tenfas…
Ttwaliɣ ila llan kraḍ n wanawen n uɣennej, zemmren ad mmersen amux dd-gguren:
1- Aɣennej azayku d yezlan:
Netta d aɣennej i tteggent temɣarin deg waṭṭas, ceṭṭḥen kid-sent, di cra n twalatin, yergazen ig ittilin zi twacunt-nsent, ttbeddan-dd arendad-nsent ttsakaren sin n waduren, ittbedda wadur amezgaru, wis sin ittedwal ɣar tkermin s tsuraf fsusent ttemḥizwarent aked wanyaten n wallunen, zi ssinni ittedwal wadur-a ɣar uraq mani ila illa, ttadaren marra idsen s ufud-nnsen afusi arendad i wadur amezgaru ig ittɛawaden s unuqer i temhelt d ict, qqaren “izlan”[1], kul “izli” ɣur-s kkuẓ n yefyiren i nzemmer ad newzen s usnay[2] ittwassnen g Arif s (Ay a ralla ya ral, ay a ralla buya) ig ittemsebḍan x sin n yefyiren, kul afyir dag-s sḍist n teyyita n wanya s wallun… Ad dd-newc amedya ya:
(A) (ya) (ral) (la) (ya) (ral)
(A) (ya) (ral) (la) (bu) (ya)
Izli, amux nniɣ iεda, dag-s kkuẓ n yefyiren, ad nini min dd ittsakaren kkuẓt d simrawt (24) n teyyita n wanya, ad dd-wceɣ da amedya s yezri ittwanna x yimenɣan n Arif (taḍalust n Ḍḍhar Ubarran):
Tnayn n ṭiyyarat
Ẓwant-id lebḥar lebḥar
icten tewta leɣḍes
icten tekks-ayi ḍar.
Asɣel n yezri:
(et) (nay) (n n) (ṭiy) (ya) (rat)
(ẓwan) (t id) (leb) (ḥar) (reb) (ḥar)
(ic) (ten) (tew) (ta) (leɣ) (ḍes)
(ic) (ten) (tekk) (s a) (yi) (ḍar)[3]
Anaw a wanitin ttraḥen kid-s wanyaten n wallunen, unuḍ n wanawen-a n yezlan ittili gi tmeldiwin n twacunt d wussan (am wussan n tyerza d tmejra… d wussan n umrabeḍ Sidi Cɛayeb Buneftaḥ), anaw a wanitin iskan ɣar uɣezdis aneẓɣur n wayda ameɣnaj n Arif.
2- Aɣennij ɣar Yimedyazen :
Imedyazen netnin d tiseḍmiwin timsadurin n uɣennej, ɣur-sen ddcurat-nsen deg waṭṭas n tqebbal am Yayt Sidal, Ayt Tuzin, Ayt Temsaman, Ayt Sɛid… atg, maca iwdan ssinfen-ten, tudrin-nsen ṭṭurfent ɣar yiraqqen uggʷjen x yewdan. Maca waxxa amenni, qa iwdan tteḥdajjan-ten di tmeɣriwin-nsen d wuraren-nsen. Ur neqqar ci qa ur ɣur-sen ci tiεeffanin-nsen am tumayin tiɛeffanin d cra n tmeslayin tiberraniyin i dd-ssidfen ɣar Arif am Ccixat… Maca ittxessa ur nettettu ci tisebḥanin n wuḍuf-nsen gi cra n yiɣezdisen n wayda ameẓwan azayku n Arif, uxa d manaya i nettaf s umedya ɣar Ccix ɛellal g uɣennij ines «Axminni war da nexliq» ig ittwassnen aṭṭas, aɣennij-a d ict tqessist d tazegrart ɣur-s tisektiwin d tinmettiyin, igg-itt g usnay ameẓwan d aneẓɣur ikna, ad nernu ila ɣur-sen εawed iɣennijen mgal aserbub (am Ḍḍhar Ubarran ɣar Yimedyazen n Yayt Temsaman). Yina ṭṭfen εawed deg yimassen imensayen am “ẓẓammar” (imis d amensay ittwagg s sin n waccawen n ugenduz) d temja, s uya tteḥdajjan Yimedyazen wi xaf-sen ɣa ireẓmen tiwwura d wi dasen ɣa irren taynit ḥuma ad iqqim wayda Arifi amaziɣ azayku idder, rid wi ten ɣa issinfen.
3- Anaw wis kraḍ :
* Tisemmumrawin[4]:
Anaw-a nettaf-it gi tzemmar i gin kra n yiḥudriyen n tsemmumrawin i ɣa ismaynun cway tawila tameẓwant wami dd ɣa ssidfen imassen imaynuten n ufilu (Banju) am unaẓur Ceɛṭuf ig isxedmen abanju s yict tmamekt d tasebḥant, iṭṭef dag-s g unagraw n uɣennij azayku, netta illan d ijj zeg yimezgura ig isxedmen armuni ig issexdamen amradaf jar yimeslan waxxa s tmamekt tehwen maca tuwi-dd ixf-ines, ijja aṭṭas n yiɣennijen ittwazemmen di Tnezwayt Tanamurt (aseggʷas n 1956). Dinni ula d anaẓur Ḥamid Utemsaman ig isxedmen lɛud [adrin] di tirart-ines, iṭṭef ula d netta deg wanya aneẓɣur. Nettaf deg yimeslan n temɣarin tanaẓurt Yamina Lxemmari s yimesli- ines asebḥan ig ittwassnen s tniɣin-ines tineẓɣurin ig iwtin iẓewran deg wayda azayku, tessexdem gi twila-ines Kamanja d wallunen. Dinni anaẓur Mudrus ig isxedmen tamamekt d ict, iṭṭef ula d netta gi teẓlayin n uẓawan n Arif, yina marra kkin-dd zi tsuta d ict.
* Tisḍimrawin:
Di tesḍimrawin, tusa-dd «tsuta n uḍeffer» ag yinaẓuren ig isxedmen tagiṭart am Bensalem Jjilali i dd-issidfen cra n tettikniyin timaynutin am tirart n tgiṭart s tmamekt n «wakurd», iεawed i flaminku Aspanyu d cra n yiɣennijen idzayriyen am uɣennij Awehrani, ila ittɣennaj s Tespanyut d Teɛeabt d Tmaziɣt, nettaf ɣur-s aɣennij n (Ini wah… Ini wah) ig ismaynu s tmamekt d tamirant teṭṭef deg wayda. Amenni ula d Farid Nnaḍuri ig isxedmen tamamekt d ict, iɛawed i yiɣennijen n ugmuḍ s Tmaziɣt, maca iṭṭef deg yezlan. Nettaf manaya ula ɣar Mimunt n Selwan d Malika n Farxana d yesmawen-nneɣni, tina waxxa ɛawdent i min ittwaggen iεda, maca xmi ssexdament imassen imensayen am «ẓẓammer» d «temja», qa tticcent-as i uɣennij-nsent ict tmust d tamaẓlayt ur tetteffeɣ zeg yiger n unagraw amatay n uɣennij n Arif.
* Tisamrawin :
Ittwagg, gi tsamrawin, yijj uɣennij d amaynu d amiran s yeswiyen d inamuren d inefganen izdigen, iga ayda d tanga-ines tamezgarut, d tmatrart d aremmus-ines, innurẓem x midden bla ma ad ismeḥ gi tmagit, minzi wi ittekken ɣar wanaw-a n uɣennej ɣrin d imedlasen. Addur n manaya ittedwal ɣar tmesmunin timaglayin am tmesmunt n usenti adelsan g Arif i dd-isḍuqqẓen tamussni ya d tmesmunin-nneḍḍen n tussna g Arif, uxa ad dd-mmersent waṭṭas n tseḍmiwin-nneḍḍen ig itteggen tizemmar ḥuma ad gent aɣennij anegdud Amaziɣ iqqnen ɣar tɣawsiwin n ufgan n Yiẓẓelmeḍ Afrik d ufgan maknaw d tasekta tagraɣlant… Tteḥsabeɣ tarmit-inu d ict zi termitin n usatal-a.
Dinn inaẓuren-nneɣni am Ṭṭufali Muḥemmed ig isxedmen tagiṭart d warmunika, ismaynu cway aɣennij n «Axminni war da nexliq» n umedyaz anegdud ɛellal mix nessiwel sennej, d Ḥimmi Zeryab i yurmen ad igg aɣennij Amaziɣ d amiran, s uya i dd ɣa issers zi ssinni tamukrist n usekki n uẓawan g Arif ɣar utaram.
Maca itteqqes lḥal wami tiseḍmiwin-a marra beddent assa, jjint araq i uɣennij amzelleε azenzay umi ɣar tawila d tumayt wḍant, uxa drus waha i εad ittsigin zeg yimeɣnaj n tseḍmiwin-a gi tekli-nsen tanaẓurt x ubrid-nsen iqesḥen, maca s tɣennant d umɣanen d tmaglayt, d wuḍuf gi tɣawsiwin n ugdud-nneɣ d wamur-nneɣ iɛizzen.
—————————
Timawin n umessuɣel:
[1] Tusa-dd g umagrad n umaray amux tt-nura, neksi gi taynit-nneɣ ad nari “izli” / “izlan” amux tettwaqqar g Arif niɣ g yiraqqen n Arif mix issawal umagrad, uxa ur tt-nettari d izli / izlan ɣir xmi tettili d asuɣel i ci n tguri d Taεrabt teskan ɣar unamek n yezli / yezli.
Ula d min dd-yusan s Tmaziɣt n Arif ɣar umaray am tguriwin mindeg nettaf /l/ (akniw n /l/) nejj-it amux dd-yusa ḥuma ad iqqim iskan ɣar tnettit tasnilast n Arif mix ixdem umaray.
[2] Nessexdem da taguri n “usnay” (addad amaruz n “asnay”) s unamek n “التفعلية”, taguri-ya nuwi-tt-id zeg “asnay n yezli” ig ittwaqqaren i (ay a ralla ya ral, ay a Ralla Buya) mix snayen izlan g Arif ḥuma ad dd-asen seggden g usɣel (lmizan) nsen.
[3] G ufyir amezgaru n yezli, ibḍa umaray snat n tergalin timezgura “t” d “n” x wayawya, uxa issufeɣ-dd zag-s snat n tifar wami ɣa irnu “e” innufren deg yiles qbel i snat-a n tergalin, maca g ufyir wis sin n yezli ya, iwca-as i “ẓwan” ict tfirt (syllabe) g ubeṭṭi-ines i tifar n ufyir waxxa nettat ɣur-s snat n tifar amux ɣur-s neẓra g ufyir amezgaru, izemmer ad yili d tazgelt deg yilugan n usɣel n tifar n yelsawen n Arif, maca netta ixzer ɣur-s da zeg uɣezdis n uɣennej mindeg ittwabezzaz x umeɣnaj ad isseɣli g uɣennej targalt i das-dd-ittmernun gi ci n ufyir, am useɣli “ẓ” (i dd-yusan gi “ẓwan”).
[4] Taguri “tisemmumrawin” (asuget n “tasemmumrawt”), nessufɣ-itt-id zi semmumraw ḥuma ad tesken ɣar “الخمسينيات”, amenni i nga ula ag “tisḍimrawin” (asuget n “tasḍimrawt” i dd-nessufeɣ zi “sḍimraw”) ig iskanen ɣar “الستينيات”, d “tisamrawin” (asuget n “tasamrawt”) i dd-nessufeɣ zi “samraw” ḥuma ad tesken ɣar “السبعينيات”. Neḍfer, g usufeɣ-nneɣ i tguriwin-a, tabridt i dd-issufɣen “tamrawt” (العشرية) zi “mraw”.